Landsvirkjun hyggst á næstu árum ráðast í einhverjar umfangsmestu fjárfestingar sem fyrirtækið hefur ráðist í. Fjárfest verður fyrir 190 milljarða á næstu fimm árum.
Landsvirkjun hyggst verja 190 milljörðum króna í framkvæmdir á næstu fimm árum. Þrátt fyrir stórhuga áform er áfram stefnt á að borga 15 til 20 milljarða króna í arð á hverju ári.
Landsvirkjun gerði upp árið 2025 á ársfundi fyrirtækisins í Hörpu í gær. Þar boðaði stjórnarformaðurinn framkvæmdir upp á 190 milljarða króna næstu fimm árin.
„Við erum að fara að reisa Hvammsvirkjun sem er vatnsaflsstöð, við erum að fara að stækka Sigöldu, við erum að fara að reisa Vaðöldu sem er fyrsta vindorkuver á Íslandi og fyrstu vindmyllurnar verða gangsettar nú í haust og svo erum við að stækka Þeistareyki,” segir Brynja Baldursdóttir stjórnarformaður.
Brynja Baldursdóttir
Uppsett afl í þessum virkjunum er um það bil þrjú hundruð megavött sem kemur til með að hjálpa fyrirtækinu að afla nýrra viðskiptavina. „Þetta eru viðskiptavinir sem tengjast landeldi og matvælavinnslu og síðan gagnaverunum. Síðan er þetta mjög mikið til að styðja við orkuskiptin í samfélaginu,“ segir forstjórinn Hörður Arnarson.
Rúmlega 110 milljarðar frá 2021
Landsvirkjun hefur sannarlega reynst gullkýr fyrir ríkissjóð. 20 milljarðar verða greiddir í arð í ár og síðustu fimm ár hefur fyrirtækið greitt um 110 milljarða króna í arð til ríkissjóðs. Þrátt fyrir fyrirhugaðar fjárfestingar er gert ráð fyrir að áframhald verði á. „Fjárfestingar hafa alltaf áhrif á fjárfestingargetuna. En við bindum vonir við það að geta haldið áfram að borga öflugan arð á bilinu 15 til 20 milljarða,” segir Hörður.
Holtavirkjun og Skrokkalda prófsteinn á ný lög
Mikill framkvæmdahugur var á fundinum, hvort sem það var hjá fulltrúum Landsvirkjunar eða ríkisstjórnarinnar, enda litla fyrirstöðu við virkjanaframkvæmdir að finna á þingi. Hjá Landsvirkjun eru menn brenndir eftir Hvammsvirkjun sem er mörgum árum á eftir áætlun, meðal annars vegna ítrekaðra dóms- og kærumála.
Alþingi samþykkti nýverið frumvarp sem einfaldar ferli rammaáætlunar og fyrir þinginu liggur annað frumvarp sem ætlað er að einfalda stjórnsýslu og stytta málsmeðferðartíma Umhverfis- og orkustofnunar. Hörður bindur miklar vonir við þau frumvörp og verða nýjustu virkjanirnar í nýtingarflokki prófsteinn á það hvort löggjöfin hafi skilað tilætluðum árangri. „Það reynir á í næstu verkefnum, sem verða þá Holtavirkjun og Skrokkölduvirkjun, hvort leyfisveitingaferlið verði orðið skilvirkara en á síðustu árum. Það er svo sannarlega þörf á því.”
Heimild: Ruv.is
