Viðbúið er að erfið staða veitingageirans og miklar framkvæmdir hins opinbera valdi hreyfingum á markaði með atvinnuhúsnæði á næstunni, sér í lagi miðsvæðis.
Innan veitingageirans er nú kvartað sáran undan kostnaðarverðshækkunum og gæti það valdið hreyfingu á markaðnum með húsnæði fyrir veitingastaði. Töluverð hreyfing er einnig fyrirsjáanleg á atvinnuhúsnæðismarkaði í miðborginni á næstu misserum vegna framkvæmda hjá hinu opinbera.
Í ritinu fjármálastöðugleiki, sem Seðlabankinn gaf út í september, segir að rekstur stóru atvinnuhúsnæðisfélaganna, Eikar, Regins og Reita, gefi vísbendingar um nokkuð jákvæðar horfur á atvinnuhúsnæðismarkaði.
Ávöxtun fjárfestingareigna hjá félögunum þremur hafi mælst 5,3% á fyrri helmingi ársins og arðsemi eiginfjár mikil í sögulegu samhengi.
Í ritinu kom fram að vísitala raunverðs atvinnuhúsnæðis mældist 17,7% yfir metinni langtímaleitni um mitt síðasta ár og hafði þá hækkað um 15,3% undanfarna tólf mánuði.
Í þróttmiklum hagvexti líkt og var hér á landi á síðasta ári má vænta þess að afkoma leigufélaga með atvinnuhúsnæði sé með ágætum og ekki lengur þörf á sérstökum Covid-úrræðum fyrir lántaka. Þó hljóta hækkandi vaxtakjör að bíta.
Heimild: Vb.is
