Í vetur verða tvær endurbættar skíðalyftur opnaðar í Bláfjöllum, þær bera nöfnin Gosinn og Drottningin.
Magnús Árnason, framkvæmdastjóri Skíðasvæða höfuðborgarsvæðisins segir að verkefnið sé langt á undan áætlun og undir kostnaði.
Hann segir lyfturnar vera fyrsta skrefið í uppbyggingarplani skíðasvæðanna.
„Þetta er allt á góðri áætlun og rúmlega það. Gosinn á að verða afhentur núna í nóvember ef það er þokkalegt veður. Það er verið að fínstilla hann.
Drottningin átti að verða tilbúin í nóvember á næsta ári, en hún verður tilbúin í desember eða janúar næstkomandi. Þannig að hún er langt á undan áætlun,“ segir Magnús.
„Það er gaman að því að það eru stór verkefni hjá okkur í gangi sem eru bæði á undan áætlun og langt undir kostnaði. Það er ekki oft sem maður heyrir það,“ bætir hann við.
Magnús segir að til standi að opna skíðasvæðin í desember og skynjar hann mikla spennu hjá landanum að komast í fjallið.
„Það er líka hellingur af spennandi hlutum að ger ast hjá okkur, til að mynda erum við komin langt á veg með nýtt gönguskíðasvæði.
Þar er aukin lýsing, fleiri snjógirðingar og nýtt salerni,“ segir Magnús sem segir að um sé að ræða fyrstu skrefin í stóru uppbyggingarplani skíðasvæðanna. „Það er margt spennandi fram undan í Bláfjöllum.“
Mynd: Frettabladid.is
