Stefnt er að því að opna fjölnota íþróttahús Garðabæjar, Vífilshöll, fyrir jól. Þetta kemur fram í nýrri stöðuskýrslu um byggingu fjölnota íþróttahússins.
Samkvæmt stöðuskýrslunni eru nú um 70 manns að vinna við verkið og unnið er samhliða í lokafrágangi á fjölmörgum verkþáttum.
Búið er að setja niður undirkerfi fyrir gervigras sem verður lagt á í vikunni. Þá er frágangur þjónusturýma langt kominn og verið er að vinna í lokafrágangi allra verkþátta.
,,Seinkun hefur verið í nokkrum verkþáttum sem aðallaga stafar af seinkun í afhendingu vara erlendis frá s.s ljós og innihurð en verktaki telur að þetta hafi ekki áhrif á afhendingu húsnæðis sem fyrirhuguð eru 22.desember 2021,” segir í stöðuskýrslu um byggingu Vífilshallar.
Heildarfermetrar Vífilshallar eru 15.770. Í höllinni verður að finna íþróttasal, tengibyggingu á tveimur hæðum og viðbyggingu íþróttahúss á þremur hæðum.
Íþróttasalur er með 11-14 metra lofthæð og inn af honum er upphitunarsvæði og svæði fyrir klifurvegg, frá 2. hæð tengi- og viðbyggingar er hægt að ganga inn á svalir sem eru hringinn í kringum íþróttasalinn.
Í tengibygging eru búningsklefar á 1. hæð og á 2. hæð er aðstaða fyrir m.a áhorfendur. Viðbygging innheldur m.a þreksal og ýmis stoðrými.
Heimild: Frettabladid.is
