Nýtt flugskýli Icelandair á Keflavíkurflugvelli hefur risið hratt og er orðið fokhelt. Stefnt er að því að taka það í notkun í október næstkomandi og að verkinu ljúki undir næstu áramót. Byggingin er um 27 metra hátt stálgrindarhús og er heildarflatarmál hennar um 13.600 fermetrar. Í byggingunni er stærsta haf í húsbyggingu á Íslandi en þakbitar milli burðarveggja spanna 95 metra.
Í nýja skýlinu munu fara fram stærri viðhaldsaðgerðir, en með því er átt við stórar skoðanir sem taka 2-6 vikur ásamt breytingum á flugvélum. Með byggingu skýlisins þrefaldar Icelandair aðstöðu sína til framkvæmdar slíkra verka og getur því flutt flest þeirra til landsins en undanfarin ár hefur Icelandair í auknum mæli þurft að leita sér þessarar þjónustu erlendis vegna stækkandi flugflota.
Eftir að ákvörðun var tekin um byggingu skýlisins hafa þegar orðið til 50-60 langtímastörf og má ætla að annað eins bætist við á næstu misserum og heildarviðbótin sé þannig yfir 100 störf. Þessa dagana verið að auglýsa eftir flugvirkjum og líklegt að ráðnir verði 20-30 til viðbótar við það sem þegar er orðið. „Icelandair hefur stutt við bakið á uppbyggingu flugvirkjanáms á Íslandi og þannig tryggt aðgang að sérmenntuðum starfskröftum, segir í tilkynningu frá fyrirtækinu.
Heimild: Sudurnes.net
