Gatnagerðargjöld stærstu sveitarfélaganna hafa að jafnaði hækkað umfram byggingarvísitölu síðustu ár.
Skattheimta í formi gatnagerðargjalda átta stærstu sveitarfélaganna hefur hækkað gríðarlega og í sumum þeirra langt umfram hækkun almenns verðlags. Þetta kemur fram í nýrri greiningu Samtaka iðnaðarins.
„Þegar litið er á þróun gatnagerðargjalda fyrir 100 fermetra íbúð í fjölbýli með stæði í bílakjallara má sjá að hún hefur í þessum sveitarfélögum að jafnaði hækkað um 67% eða 1,8 milljón krónur á íbúð á tímabilinu frá 2020 til 2025. Á sama tíma hækkaði byggingarvísitalan um 37%.“
Þannig hafi gatnargerðargjöld að jafnaði numið 2,7 milljónum króna á hverjua 1010 fermetra íbúð árið 2020 en voru komin í 4,5 milljónir árið 2025.
Hækkanir á gatnagerðargjöldum á árunum 2020-2025 ráðast annars vegar af 37% hækkun á byggingarvísitölu og hins vegar af breytingum sveitarfélaga á álagningarhlutfalli, sem getur að hámarki verið 15% af verðgrunni fyrir gatnagerðargjöld.
Mosfellsbær og Akureyri með gjöldin í toppi
Vakin er athygli á því að sveitarfélögin hagi sér mjög ólíkt með tilliti til þessarar heimildar. Mosfellsbær og Akureyri séu til að mynda bæði með álagningarhlutfallið í lögbundnu hámarki, 15%.
Mosfellsbær hafi haldið hlutfallinu óbreyttu frá 2020 en Akureyri hefur hækkað álagningarhlutfallið í nokkrum skrefum frá árinu 2020 en hlutfallið stóð í 5% í upphafi þess árs.
Reykjavík hækkaði á árinu hlutfallið úr 5,4% í 10% fyrir íbúðir í fjölbýli og til viðbótar var samþykkt að innheimta gatnagerðargjald að fullu fyrir bílakjallara.
Hafnarfjarðarkaupstaður er eina sveitarfélagið sem lækkaði álagningarhlutfallið á tímabilinu sem um ræðir. Framan af var hlutfallið í lögbundnu hámarki en árið 2022 var það lækkað í 6%.
Heimild: Vb.is
