Fyrirhuguð uppbygging ferðaþjónustu í Gaddstaðaey í Ytri Rangá mætir hörðum viðbrögðum af hálfu veiðifélags Ytri Rangár og einnig frá rekstraraðilum árinnar.
Ólafur Einarsson er framkvæmdastjóri fyrirtækisins Þjótanda ehf. sem er eigandi Gaddstaðaeyjar og hefur félagið óskað eftir við sveitarfélagið Rangárþing ytra að reisa fjögurra hæða hótel með bílakjallara ásamt gestahúsum eða smáhýsum í eyjunni.
Þá er stefnt að því að setja upp heita potta við hótelið en slík uppbygging er afar vinsæl þessi misserin. Gaddstaðaey er hluti af þéttbýlinu á Hellu.
Reiknað er með að ríflega 400 manns geti gist í þeirri aðstöðu sem nú er stefnt að því að byggja á eyjunni en hún er samtals um tíu hektarar að stærð. Til að framkvæmdir geti hafist og fengið samþykki var þörf á að breyta aðalskipulagi.
Málið er nú hjá skipulagsyfirvöldum í Rangárþingi ytra til skoðunar og í skipulagsgátt hjá Skipulagsstofnun.
Mótmæla uppbyggingu í Gaddstaðaey
Veiðifélag Ytri Rangár lýsir sig alfarið á móti áformunum og óttast fyrst og fremst að þessi uppbygging verði til þess að veiðimenn njóti ekki lengur þess friðar sem ríkt hefur á svæðinu. Skammt frá Gaddstaðaey er einn gjöfulasti og þekktasti veiðistaður Ytri.
Það eru Rangárflúðir. Gunnar Jóhann Gunnarsson er formaður veiðifélagsins og segir hann að félagið og rekstraraðilar hafi miklar áhyggjur af þessum framkvæmdum, komi til þeirra.
Í athugasemdum sem veiðifélagið hefur sent sveitarfélaginu er alfarið lagst gegn framkvæmdinni.
„Veiðifélagið hefur byggt upp laxveiðiá og þjónustu í kringum ánna á heimsmælikvarða og við teljum að uppbygging í eyjunni setji allt það góða starf í hættu.
Miklar líkur eru á mengunarslysi frá bílum, mörg hundruð gestum og baðlóni, slysi sem muni hafa veruleg áhrif á Veiðifélagið og þá fjárfestingu sem veiðifélagið hefur sett í vörumerkið og ímynd Ytri Rangá/West Ranga.
Dæmin hafa sýnt sig að þrátt fyrir að menn séu að fara eftir ýtrustu lögum og reglum varðandi fráveitur og framkvæmdir að þá gerast slysin,“ segir í bréfi formanns veiðifélagsins. Félagið lýsir áhyggjum af fleiri þáttum svo sem eins og ljósmengun og þá er nefndar áhyggjur af klórslysi.
Mega bara veiðimenn njóta?
„Þetta er enn í skipulagsferli og við sjáum bara hvað kemur út úr því,“ svaraði Ólafur Einarsson spurður um hvar þessi áform væru stödd. Hann er líka landeigandi að Ytri Rangá og þar af leiðir að hann á einnig aðild að veiðifélaginu.
„Það er nú ekkert óalgengt að laxveiðiár renni í gegnum þéttbýli,“ segir hann aðspurður hvort þetta kunni ekki að valda óþægindum fyrir veiðimenn. Hann spyr á móti: „Eiga bara veiðimenn að fá að njóta áa og þeirrar náttúru sem þær hafa upp á að bjóða?“
Fyrst þegar hugmyndirnar voru kynntar segir Ólafur að margir hafi verið áhugasamir og viljað vinna þetta með honum og hans fólki. Má skilja á honum að þar eigi hann við veiðifélagið og rekstraraðila. Nú sé komið annað hljóð í strokkinn og þau vilji ekkert af þessu heyra og séu alfarið á móti verkefninu.
Hann segist þegar hafa tekið tillit til athugasemda sem fram hafi komið og hætt við áform um að byggja smáhýsi á vestari hluta eyjunnar, en það er sá bakki sem snýr út að Rangá. „Allt frárennsli frá þessum byggingum fer inn á lokað fráveitukerfi hjá sveitarfélaginu.
Þannig að það á að vera eins og best verður á kosið. Vissulega hafa orðið breytingar á ánni í gegnum tíðina. Þetta var ekki laxveiðiá hér áður fyrr og það er víða búið að koma upp sleppitjörnum og ekkert nema gott um það að segja. Ég held að þessi breyting þurfi ekki að vera mikið áhyggjuefni,“ sagði Ólafur.
„Þetta skýrist á næstu vikum í hvaða ferli þetta fer,“ bætir hann við.
Ekki sama vara
Félagði Iceland Outfitters annast rekstur Ytri Rangár og heyra mátti á Hörpu Hlín Þórðardóttur, annars eiganda IO að hún hefur miklar áhyggjur af málinu. Hún, eins og Gunnar formaður, telur að verði þetta samþykkt muni það hafa mikil áhrif og Ytri Rangá bíða hnekki.
„Það vilja allir komast á Rangárflúðir hjá okkur, eðlilega. En þessar byggingar munu breyta þeirri upplifun mjög mikið. Við erum ekki að selja sömu vöru ef þetta verður að veruleika,“ sagði Harpa Hlín í samtali við Sporðaköst.
Næstu vikur munu skera úr um framhaldið og er þar beðið niðurstöðu skipulagsyfirvalda. Verði gefið grænt ljós er fyrsta verkefnið að byggja brú út í eyjuna og leggja þangað veg. Zeppelin arkitektar hafa hannað og haldið utan um verkefnið fyrir Þjótanda ehf.
Heimild: Mbl.is
