Innviðaráðherra segir enga skýra stefnu vera til staðar í því hvort eigi að malbika eða notast við svokallaða klæðningu í vegagerð. Þetta segir Eyjólfur Ármannsson innviðaráðherra í samtali við mbl.is.
Borið hefur á því undanfarið að malbiki „blæði“ þegar vel viðrar, sérstaklega á Vesturlandi, en hiti veldur þessu. Slíkar aðstæður geta valdið tjóni á ökutækjum og hættu fyrir ökumenn.
Félag íslenskra bifreiðaeigenda hefur talað um neyðarástand í vegakerfinu í þessu samhengi.
Fimm sinnum dýrara
„Vegagerðin hefur óskað eftir því að fá að malbika meira. Malbik er fimm sinnum dýrara. Það hefur í för með sér öruggari vegi og minna viðhald,“ segir Eyjólfur.
Ráðherrann segir „frábært ef hægt væri að malbika meira“. Hann segir það hins vegar vera kostnaðarspursmál.
„Það er ekki búið að móta neina stefnu. Við ætlum að setja þrjá milljarða aukalega í þetta núna,“ segir hann. Það er í samræmi við það sem kemur fram í fjáraukalögum.
Framkvæmdastjóri Vegagerðarinnar, Bergþóra Kristinsdóttir, segir meira bera á blæðingu malbiks í ár en undanfarin ár.
Heimild: Mbl.is
