68% stjórnenda fyrirtækja í mannvirkjaiðnaði segja að fyrirtæki þeirra hafi haft frumkvæði að breytingum í rekstrinum eða umhverfi mannvirkjaiðnaðar sem hafi jákvæð umhverfisáhrif.
Þetta kemur fram í könnun sem Outcome framkvæmdi fyrir Samtök iðnaðarins og greint er frá í nýrri greiningu SI.
Ekki nema 24% stjórnenda segja að fyrirtæki þeirra hafi ekki haft frumkvæði að slíkum breytingum. Könnunin var send á stjórnendur fyrirtækja sem koma að mannvirkjaiðnaði, þ.e. vegna hönnunar og rágjafar, jarðvinnuverktöku, byggingarstarfsemi o.fl.
Þegar spurt var hvort einhverjar hindranir hafi staðið í vegi fyrir því að fyrirtæki hefðu frumkvæði að aðgerðum sem hafa jákvæð umhverfisáhrif mátti merkja nokkurn samhljóm um að skortur væri á 1) fjárhagslegslegum hvötum til að gera slíkar breytingar, 2) langtímasýn og samræmingu verkkaupa og stjórnvalda hvað varðar umhverfiskröfur.
Það er mat Samtaka iðnaðarins að niðurstöðurnar gefi vísbendingar um að mannvirkjaiðnaðurinn kalli eftir fyrirsjáanleika og benda samtökin einnig á að samræming umhverfisskilmála í opinberum útboðum séu forsenda þess að markaðurinn geti sett fram áreiðanlegar áætlanir og byggt upp þekkingu starfsfólks með vissu um að hún muni nýtast til lengri tíma.
Í könnuninni kemur fram að 79% stjórnenda fyrirtækja í mannvirkjaiðnaði segjast finna fyrir auknum kostnaði vegna áherslna á umhverfismál. 21% segjast ekki finna fyrir aukningu í slíkum kostnaði.
Hér er hægt að nálgast greininguna.
Heimild: SI.is
