„Það er alveg klárt mál og er búið að vera svo síðan í fyrrahaust en þá urðu í raun allir jarðvinnu- og malbiksverktakar mjög varir við að verkefnum sem í boði voru fækkaði og hefur svo verið síðan,“ segir Sigþór Sigurðsson, framkvæmdastjóri Colas, en hann er jafnframt formaður Mannvirkis, hagsmunafélags jarðvinnu- og byggingaverktaka, spurður um samdrátt í greininni.
Hann segir að þar sé fyrst og fremst Vegagerðinni um að kenna og vegna skorts á fjárveitingum frá Alþingi. Hann segir að brýnt sé að fara að vinna á innviðaskuldinni og einnig þurfi fyrirtækin í greininni að hafa stöðugleika og fyrirsjáanleika í sinni starfsemi og að áætlanir séu trúverðugar.
„Bitu höfuðið af skömminni“
„Þeir bitu höfuðið af skömminni með því að fresta afgreiðslu samgönguæáætlunar á Alþingi í vor og setja Vegagerðina í klemmu sem getur þannig ekki boðið út verkefni,“ segir hann og segir að sér finnist skrýtið að stofnunin geti ekki haldið uppi dampi í vegagerð þótt ekki sé endanlega búið að njörva niður fjárheimildir.
„Þetta er mikið hökt og högg fyrir fyrirtæki sem eru að reyna að halda samfellu í sínum rekstri,“ segir hann.
Nánar má lesa um málið í Morgunblaðinu í dag, miðvikudag.
Heimild: Mbl.is
