Segir sam­stöðu lykilinn að jarð­ganga­gerð Fær­eyinga

Í fréttum Stöðvar 2 var fjallað um jarðgangamál Færeyinga, sem á undanförnum árum hafa lokið við hvert stórvirkið af öðru. Einna stoltastir eru þeir af hinum 11,2 kílómetra löngu Austureyjargöngum, með hringtorgi sem skreytt er með listaverki.

„Með hringtorgi niðri á hafsbotni. Þetta er eina hringtorgið sem er á hafsbotni í öllum heiminum,” segir Heðin Mortensen, borgarstjóri Þórshafnar.

Núna er verið að grafa sex ný jarðgöng sem bætast við á þriðja tug jarðganga sem fyrir eru í Færeyjum.

Nýjustu neðansjávargöngin eru þau sem liggja milli Straumeyjar og Sandeyjar. Þau eru 10,8 kílómetra og voru opnuð skömmu fyrir síðustu jól. Sandeyjargöngin eru björt og víðfeðm og þar má sjá listaverk á veggjum í innskotum.

Þegar Íslendingar spyrja hvernig hægt sé að grafa öll þessi göng í Færeyjum heyrist stundum sú skýring að það hljóti að vera Danir sem borgi. En er það svo?

„Danir borga ekki einn eyri í göngum okkar né vegakerfi,” svarar Heðin Mortensen, sem kemur úr Javnaðarflokknum, forystuflokki landsstjórnarinnar.

„Nei, það eru ekki danskir peningar,” svarar Høgni Hoydal, utanríkis- og atvinnumálaráðherra og formaður Þjóðveldis.

„Það er þannig að við erum nánast laus við danska peninga núna. Við höfum minnkað stuðning Dana niður í nánast ekki neitt. Eftir að við gerðum það höfum við byggt upp landið með okkar eigin fjármunum,” segir Høgni.

En hvernig fara Færeyingar þá að? Høgni segir lykilinn vera algjöra samstöðu um þá forgangsröðun að tengja byggðirnar með jarðgöngum.

„Það eina sem við erum sammála um í færeyskum stjórnmálum.

Við erum ósammála um allt. Um fullveldið og hægri og vinstri.

En við erum sammála um að það verði að tengja landið saman. Hver einasta landsbyggð, hver einasta eyja verði að tengjast svo Færeyjar geti vaxið og orðið nútímasamfélag. Það eru allir stjórnmálaflokkar sammála um þetta,” segir Høgni.

Og það er ekki svo að rukkað sé í öll göng. Vegtollur er eingöngu í neðansjávargöngum, sem núna eru fern talsins, en Færeyingar hófu ekki að grafa göng undir sjó fyrr en þeir sáu Íslendinga gera það.

„Þarna kom innblásturinn frá Íslandi eins og svo oft áður. Hann kom frá Hvalfjarðargöngum. Það var þegar Færeyingar fóru í heimsókn til Íslands og sáu þau, neðansjávargöngin. Þá fórum við að grafa þau fyrstu og síðan hafa þau komið koll af kolli og núna vilja allir fá þau,” segir Høgni Hoydal.

Heimild: Visir.is