Vinna að varnargörðum við Svartsengi er í fullum gangi um þessa mundir og unnið er dag og nótt. Blaðamaður og ljósmyndari mbl.is skoðuðu vinnusvæðið í dag, rétt áður en skyndirýming átti sér stað.
Vinnan er hafin austan megin við Þorbjörn þar sem blaðamaður var á ferð, en búið er að koma fyrir efni og jarðvinnuvélar farnar að ýta upp í varnargarðinn.
Ari Guðmundsson, verkfræðingur á svæðinu sagði í samtali við mbl.is í morgun:
„Það fer eftir því hvort við tökum þetta í áföngum eða ekki en þessi vinna getur tekið nokkrar vikur,“ spurður hve langan tíma það tæki að reisa varnargarðanna.
Mikill viðbúnaður á svæðinu
Mikill viðbúnaður var á svæðinu, en blaðamaður og ljósmyndari þurftu að bíða í um þrjár klukkustundir áður en leyfi fékkst til að halda inn á svæðið í kringum Svartsengisvirkjun og Bláa lónið í lögreglufylgd. Á meðan biðinni stóð mátti þó sjá fjöldann allan af stórum ökutækjum, sem voru að flytja efni.
Auk undirbúnings fyrir garðana var einnig verið að ryðja vegi til að geyma verktækin.
Á ofangreindri mynd má sjá hvar efni og vinnuvélar voru geymdar, en austan við Þorbjörn má sjá jarðvinnuvél sem Ari Guðmundsson, verkfræðingur á svæðinu staðfesti í samtali við mbl.is að væri byrjuð að setja upp varnargarða austanmegin við virkjunina og lónið.
Sjá mátti ýtu sem var brölta upp hálsinn, yfir ósnertan jarðveg, í átt að jarðvinnuvél sem þar var að störfum.
Kallað til allsherjarrýmingar
Hvorki gafst tækifæri til viðtals á svæðinu né til þess að skoða vinnuna vestanmegin við Þorbjörn, því kallað var til allsherjarrýmingar á svæðinu sökum mælinga á brennisteinsgasi.
Heimild: Mbl.is
