Seltjarnarnesbær hefur tekið ákvörðun um að fara af stað með söluferli á fasteigninni Safnatröð 1 á Seltjarnarnesi. Í fasteigninni er rekið hjúkrunarheimili og einnig er þar þjónustuhluti fyrir aldraða á Seltjarnarnesi.
Þetta kemur fram í fréttatilkynningu frá Seltjarnarnesbæ.
Byggingu eignarinnar lauk árið 2019 og mars það ár hóf hjúkrunarheimilið Seltjörn starfsemi þar. Stór hluti fasteignarinnar er í langtímaleigu til ríkisins og fram kemur í tilkynningunni að markmiðið sé að „selja hana til aðila sem sérhæfir sig í fasteignarekstri ef ásættanlegt tilboð berst.“
„Áréttað er að aðeins er um söluferli á fasteign að ræða en ekki er um að ræða breytingu á þeirri starfsemi sem rekin er í fasteigninni. Vigdísarholt ehf. sem rekið hefur hjúkrunarheimilið og dagdvölina verður áfram með reksturinn,“ segir í tilkynningunni.
Þór Sigurgeirsson, bæjarstjóri Seltjarnarnesbæjar segir í samtali við fréttastofu að markmiðið með sölunni sé „að losa um fjármagn sem bundið er í fasteigninni Safnatröð 1 til að fjármagna aðrar framkvæmdir bæjarins.“
Á meðal slíkra framkvæmda er bygging nýs leikskóla á Suðurströnd.
Heimild: Visir.is
