Gömlu náðhúsin undir kirkjutröppunum við Akureyrarkirkju munu fá nýtt hlutverk í framtíðinni.
Margir eldri Akureyringar og aðkomumenn muna eftir náðhúsunum, steinsnar frá Hótel KEA.
Í maí 2022 keypti fasteignafélagið Reginn af Akureyrarbæ gömlu náðhúsin, með þeim skilyrðum að gerðar yrðu endurbætur á tröppunum þar fyrir ofan. Kirkjutröppurnar yrðu rifnar og þær endursteyptar og uppfærðar með nýrri lýsingu, snjóbræðslu og nýjum granítsteini.
Fram kemur á vef Regins að samhliða þessu verkefni hafi Reginn í samstarfi við AVH skoðað framtíðarnotkun á gömlu náðhúsunum undir tröppunum. Hugmyndir um skemmtileg verslunar- og þjónusturými með möguleg tengsl við KEA hafa verið til skoðunar, en Reginn á húsnæðið sem hýsir Hótel KEA. Horft hefur verið til þess að byggja viðbyggingu sem vinni saman með umhverfinu í kring og dragi ekki úr ásýnd trappanna.
Endurbætur á kirkjutröppunum hófust í byrjun júlí og verklok eru áætluð 15. október.
Heimild: Mbl.is
