Fyrsta skóflustungan að hreinsistöðinni Steingerði við Hellisheiðarvirkjun var tekin í gær af ON og Carbfix.
Fyrsta skóflustungan að hreinsistöðinni Steingerði við Hellisheiðarvirkjun var tekin í gær en með tilkomu hennar verður nær allt koldíoxíð og brennisteinsvetni frá virkjuninni.
Framkvæmdastýra Carbfix og Árni Hrannar Haraldsson framkvæmdastjóri Orku Náttúrunnar tóku fyrstu skóflustungu að stöðinni, sem mun bera heitið Steingerður.
Í tilkynningu segir að skóflustungan marki upphaf framkvæmda vegna Silfurbergsverkefnisins svokallaða sem er samstarfsverkefni Carbfix og Orku náttúrunnar. Markmið þess er að reisa öflugri hreinsistöð sem mun, ásamt núverandi hreinsistöð, fanga nær allt koldíoxíð og brennisteinsvetni úr útblæstri Hellisheiðarvirkjunar og dæla því niður í nálæg basaltberglög til varanlegrar steinrenningar með Carbfix tækninni.
Stefnt er að gangsetningu Steingerðar árið 2025 og verður Hellisheiðarvirkjun þar með nær sporlaus, fyrst jarðvarmavirkjana á heimsvísu.
„Það er Orku náttúrunnar mikilvægt að vera hluti af lausninni gegn hamfarahlýnun jarðar. Það er því mikið ánægjuefni þegar Hellisheiðarvirkjun verður farin að framleiða nánast sporlaust og nýta jarðvarmann á sjálfbæran hátt,“ segir Árni Hrannar Haraldsson framkvæmdastjóri ON.
Núverandi hreinsistöð á Hellisheiði sem var tekin í gagnið árið 2014 fangar um 30% koldíoxíðs og 75% brennisteinsvetni frá virkjuninni. Verkefnið hlaut árið 2021 600 milljóna króna styrk úr Nýsköpunarsjóði Evrópusambandsins.
„Það er afar ánægjulegt að framkvæmdir við byggingu Steingerðar séu að hefjast enda höfum við unnið lengi að þessum áfanga með ON. Þetta hjálpar okkur á vegferð okkar við að kynna Carbfix tæknina sem er í senn hagkvæm og umhverfisvæn loftslagslausn sem getur haft áhrif langt út fyrir landsteinana,“ segir Edda Sif Pind Aradóttir, framkvæmdastýra Carbfix.
Heimild: Vb.is
