Vegagerðin hefur óskað eftir tilboðum í tvöföldun Reykjanesbrautar milli Krýsuvíkurvegar og Hvassahrauns og vinnu við aðliggjandi hliðarvegi. FÍB greinir frá þessu á vef sínum, en þetta er seinasti einbreiði kaflinn á Reykjanesbraut.
Reisa þarf fimm brýr og leggja ein undirgöng úr stáli en kaflinn á Reykjanesbraut er 5,6 kílómetra langur. Mislæg gatnamót verða við Rauðamel auk þess sem mislæg gatnamót við Straumsvík verða stækkuð og bætt við tengingu í átt að iðnaðarsvæðinu við Álhellu í Hafnarfirði.
Útboð fyrir þennan hluta tvöföldunar Reykjanesbrautar eru auglýst á öllu Evrópska efnahagssvæðinu, tilboð verða opnuð 5. apríl og gangi allt að óskum gætu framkvæmdir hafist í maí en ætlunin er að verkinu verði lokið í júní 2026.
Vegagerðin stendur að verkinu í samvinnu við Hafnarfjarðarbæ, Veitur, HS Veitur, Mílu, Orkufjarskipti, Ljósleiðarann og Carbfix.
Heimild: Ruv.is
