Home Í fréttum Undirskrift samninga utboda Samningur undirritaður vegna Öldu – brúar yfir Fossvog

Samningur undirritaður vegna Öldu – brúar yfir Fossvog

171
0
Magnús Arason, verkefnisstjóri hjá EFLU, Arndís Ósk Arnalds, forstöðumaður Borgarlínu úr Borgarlínuteymi Vegagerðarinnar, og Helga J. Bjarnadóttir, sviðsstjóri Samfélagssviðs EFLU.

Samningur um hönnun á nýrri brú yfir Fossvog var undirritaður í höfuðstöðvum EFLU í vikunni. Hönnunartillagan var unnin af EFLU í samstarfi við BEAM Architects , bar sigur úr býtum í hönnunarsamkeppni Vegagerðarinnar undir lok síðasta árs.

Leynd var yfir samkeppninni meðan á henni stóð og gilti ströng nafnleynd um höfunda tillagnanna hjá dómnefnd.

Alda – tillaga EFLU og BEAM Architects að nýrri brú yfir Fossvog.

Nýja brúin er ætluð gangandi og hjólandi vegfarendum ásamt því að vera lykillinn að leið Borgarlínunnar yfir Fossvog. Hún lokar 5 km hring um hið vinsæla útvistarsvæði í Fossvogi og eykur notagildi og aðdráttarafl svæðisins. Brúin mun verða áberandi kennileiti í borgarumhverfinu og fellur vel að skipulagi og þeirri þróun sem vænta má til framtíðar í Reykjavík.

Að sögn Magnúsar Arasonar, verkefnisstjóra hjá EFLU, er um mjög mikilvægt verkefni að ræða. „Á íslenskan mælikvarða liggur sérstaða verkefnisins í stærð þess og einnig staðsetningunni í hjarta höfuðborgarsvæðisins. Við munum nú strax taka til við að þróa áfram samkeppnistillöguna í samstarfi við okkar samstarfsaðila og verkkaupa og erum spennt fyrir því verkefni. Um stórt og mikið hönnunarverk er að ræða en við höfum fundið að það hafa allir áhuga á að leggja því lið.

Gert er ráð fyrir að hönnun brúarinnar ljúki á fyrri hluta næsta árs og að brúin verði tilbúin þegar Borgarlínan byrjar að ganga árið 2025.

Heimild: Efla.is

 

 

Previous articleAldís segir útlit fyrir bætur upp á 108 milljónir
Next articleÁ fimmta hundrað í­búðir verða byggðar á Heklu­reitnum