Mótmælendur létu ekki segjast og þurfti lögregla á endanum að flytja þá með valdi svo að borgarstjórinn gæti, heldur vandræðaleg, stungið skóflunni niður.
Mótmælin eru til marks um hve umdeild framkvæmdin er. Háleitar hugmyndir eru uppi um stærðarinnar landfyllingu sem nefnist Lynetteholm og á að koma fyrir í Eyrarsundi milli hverfanna Refshaleøen og Norðurhöfn, svo að segja í beinni sjónlínu frá Löngulínu þar sem Litlu hafmeyjuna er að finna. Framkvæmdin hefur verið sögð sú stærsta í Kaupmannahöfn frá því Kristján IV. lét byggja Kristjánshöfn á fyrri hluta 17. aldar.
Eyjan á að vera að fullu byggð árið 2070 og eiga íbúar þá að verða um 35 þúsund. Markmiðið ku vera að bregðast við íbúðaskorti í Kaupmannahöfn en auk þess á eyjan að veita borginni vörn gegn sjávarföllum og veitir ekki af með fyrirséðri hækkun á yfirborði sjávar.
Svona sjá arkitektar fyrir sér að verði umhorfs við Lynetteholm.
Óttast að reikningurinn lendi á skattgreiðendum
Himinhár kostnaðurinn er meðal þess sem situr í mörgum Kaupmannahafnarbúanum. Kostnaður við landfyllinguna er metinn af yfirvöldum á um 20 milljarða danskra króna, um 400 milljarða íslenskra, en inni í því er aðeins kostnaður við landfyllinguna, lestarsamgöngur og vegi.
Opinbert hlutafélag mun sjá um framkvæmdina og síðar selja byggingarréttinn á eyjunni. Með því á að fjármagna innviðauppbyggu ekki aðeins á Lynetteholm sjálfum heldur annars staðar í borginni, til að mynda lagningu nýrrar jarðlestarlínu sem kemur við á eynni.
Margir hafa efasemdir um að áætlanirnar standist, og geri þær það ekki er næsta víst að reikningurinn lendi á skattgreiðendum.
Vöruflutningalestir í gegnum borgina
Raskið sem fylgja mun framkvæmdunum er ekki síður umdeilt. Landfyllingin á að vera 2,5 ferkílómetrar að stærð eða litlu stærra en sveitarfélagið Seltjarnarnes. Um 40 milljón rúmmetra af jarðvegi þarf til verksins, eða um 2,5 milljónir drekkhlaðna vörubíla – sem allir þurfa að keyra í gegnum Kaupmannahöfn. Þannig reiknast mönnum til að á í tíu tíma á sólarhring í heil þrjátíu ár þurfi meira en einn vörubíll á mínútu að keyra gegnum borgina.
Þá eru umhverfisáhrifin ótalin. Dönsk náttúruverndarsamtök hafa stefnt danska ríkinu fyrir að hafa ekki farið í fullnægjandi umhverfismat á áhrifum framkvæmdarinnar.
Landfyllingin hefur verið á áætlun frá árinu 2018 þegar danska þingið veitti framkvæmdinni blessun sína.
Hún nýtur nokkuð breiðs stuðnings í danskri pólitík, hjá jafnaðarmönnum og Venstre – stærsta hægriflokki landsins – auk fleiri flokka, en ekki allra. Vinstriflokkurinn Einingarlistinn er sá flokkur sem hefur verið einarðastur í andstöðu sinni við áformin.
Í borgarstjórnarkosningum í Kaupmannahöfn í vor urðu þau sögulegu tíðindi að jafnaðarmenn urðu í fyrsta sinn ekki stærstir í kosningunum. Jafnaðarmannaflokkurinn tapaði um tíu prósentustigum milli kosninga á sama tíma og Einingarlistinn bætti við sig og varð stærsti flokkurinn.
Rauðu línurnar sýna hvar umferð vörubílanna verður mest. Þær grænu sýna hvar umferð verður minni en við aðra stóra framkvæmd, Norðurhöfn.
Heimild: Ruv.is
