Íbúar í tveimur fjölbýlishúsum, við Sólvallagötu 80-84 og Ánanaust 15, sendu borginni bréf um miðjan mánuðinn þar sem velt var vöngum yfir væntanlegum byggingum á svokölluðum Steindórsreit sem afmarkast af Framnesvegi, Hringbraut og Sólvallagötu.
Íbúarnir eru uggandi yfir aukinni umferð fram hjá Vesturbæjarskóla og skorti á bílastæðum. Þeir biðja borgina að vanda til verka þegar kemur að skipulagningu bílaumferðar.
Íbúar vonast eftir fundi með Pawel Bartoszek, formanni skipulags- og samgönguráðs, til að fá svör og útskýringar á þeim aðgerðum sem valdið gætu augljósum umferðarteppum og slysahættu.
Fram hefur komið að fleiri reitir séu í byggingu á svæðinu eða á leið í byggingu en samkvæmt talningu íbúa munu 630 íbúðir fara í sölu á næstu árum, það sé á tíu ára plani.
Þau börn sem búa muni í íbúðunum muni að öllum líkindum ganga í Vesturbæjarskóla og þétting byggðar muni skapa verulegan þrýsting á umferðargötur sem liggja að skólanum.
Íbúar benda á að borgin hafi breytt inn- og útakstri við bygginguna á Steindórsreit í borgarstjórn í júní. Þar með fer umferðin öll um húsagötur en ekki stofnæðar.
Samþykktin hafi verið gerð án grenndarkynningar og telja húsfélögin að borgaryfirvöld hafi brotið siðferðislega á rétti þeirra um upplýsingagjöf í ljósi fyrri samskipta.
Heimild: Frettabladid.is
