Vel gengur að gera útsýnispall efst á Bolafjalli í rúmlega 600 metra hæð yfir sjávarmáli.
Á þessum myndum Guðmundar Ragnarssonar má sjá verið er að festa burðarbita pallsins í bergið.
Fer ekki milli mála að mikil áhersla er lögð á örugga festingu, enda á útsýnispallurinn að standa út fyrir bjargvegginn svo þeir sem ganga út á pallinn munu horfa niður 600 metra þverhnýpi.
En eins og líka má sjá mun útsýnið verða stórfenglegt, a.m.k. á degi eins og þeim sem var á fjallinu í gær.
Horft er yfir Ísafjarðardjúpið á Ritinn, Grænuhlíðina, Jökulfirðina, Maríuhornið, Grunnavíkina, Núpinn og Snæfjallaströndina.
Svo er því haldið fram að ef horft er til vinstri yfir hafið muni stundum sjást til Grænlands.
Framkvæmdasjóður ferðamannastaða úthlutaði í fyrra 160 milljónum króna í byggingu útsýnispallsins.
Það var sömu dagana og Covid19 brast á svo tímaáætlanir hafa eitthvað riðlast til, en nú er stefnt að því að taka pallinn í noktun í haust. Er ekki annað að sjá en að það muni ganga eftir.
Heimild: BB.is
