Nýtilkominn áhugi á lóðum
Í Varmahlíð búa nú um 130 manns. Sigfús Ingi Sigfússon, sveitarstjóri sveitarfélagsins Skagafjarðar segir að áhugi á lóðum fyrir nýbyggingar sé nokkuð nýtilkominn en hann sé mikill.
„Þær lausu lóðir sem við höfum haft til umráða, það hefur verið slegist um þær og það er aukinn áhugi á að byggja í Varmahlíð og við viljum gjarnan mæta þessari eftirspurn með því að fjölga lóðum og erum í deiliskipulagsvinnu í því skyni,“ segir Sigfús.
30 lóðir ætlaðar undir byggingar
Stefnt er að því að hægt verði að úthluta nokkrum lóðum á komandi hausti. Markmiðið er að hægt verði að byggja á næstu árum á 30 lóðum.
Sigfús á ekki von á að allar lóðirnar seljist á einu bretti en sveitarfélagið vilji vera í stakk búið til að mæta aukinni eftirspurn.
Áhuginn ætti ekki að koma á óvart
Nokkur íbúafjölgun virðist því ætla að verða í Varmahlíð næstu ár. Til að standa undir þeim breytingum verður ráðist í gagngerar endurbætur á skólahúsnæði þorpsins.
Sigfús segir að það sé gott að búa í Varmahlíð og því ætti þessi áhugi ekki að koma á óvart.
„Þetta er góður þéttbýlisstaður með mikilli þjónustu og svo er stutt í atvinnu bæði þar á staðnum og víðar í firðinum. Samgöngur eru þar góðar, þetta er vel í sveit sett,“ segir Sigfús.
Heimild: Ruv.is
