Framkvæmdasýsla ríkisins (FSR), fyrir hönd verkkaupa sem er Nýr Landspítali ohf. (NLSH) óskar eftir tilboðum í verkið „Nýr Landspítali við Hringbraut – Götur, veitur, lóð og sjúkrahótel”.
Framkvæmdin er á norðurhluta lóðar Landspítala við Hringbraut milli Kvennadeildar, K-byggingar og Barónsstígs. Verkinu er skipt í tvo verkhluta samanber eftirfarandi:
Verkhluti GVL – Götur, veitur og lóð
Helstu þættir þessa verkhluta eru:
- Aðstöðusköpun
- Upprifi á núverandi yfirborði gatna, göngustíga, bílastæða og grænna svæða ásamt jarðvinnu fyrir sjúkrahótelið
- Öll vinna við lagnir á svæðinu
- Uppsteypa tengiganga og stoðveggja
- Nýbygging gatna, bílastæða og gönguleiða, ásamt öllum lóðarfrágangi
Verkhluti SJH – Sjúkrahótel, bygging
Sjúkrahótelið er hluti af fyrsta áfanga uppbyggingar Landspítala (NLSH) við Hringbraut. Það mun rísa norður af C-álmu Kvennadeildar. Hótelið mun tengjast Barnaspítala/Kvennadeild um tengigang í kjallara. Í byggingunni eru 75 hótelherbergi.
Byggingin er kjallari og fjórar hæðir – 4.258 m2 að stærð (brúttó) og 14.780 m3 (brúttó) með kjallara og tengigöngum sem tilheyra hótelinu.
Helstu þættir þessa verkhluta eru:
- Jarðvinna að hluta
- Uppsteypa
- Einangrun, steinklæðning og þakfrágangur
- Gluggar og frágangur glugga
- Neysluvatnslagnir, vatnsúðakerfi, fráveita og loftræsisamstæða
- Raflagnir og smáspennulagnir
- Innrétting starfsmannaaðsstöðu og hótelherbergja
- Innréttinga matsalar, setustofa og skrifstofa
- Vörulyfta og fólkslyftur
Verkinu öllu skal vera að fullu lokið í 1. júní 2017. Áfangaskil eru 1. júní 2016 og 15. mars 2017.
Verkefnið hefur verið unnið samkvæmt aðferðarfræði upplýsingalíkana mannvirkja (Building Information Modeling – BIM) og aðferðafræði vistvænnar hönnunar. Stefnt er að því að byggingin verði vottuð sem vistvænt mannvirki samkvæmt alþjóðlega umhverfisvottunarkerfinu BREEAM.
Haldið verður námskeið fyrir bjóðendur, á útboðstíma, um BIM kröfur – á þeim tíma sem fram kemur í kafla 0.1.2 Útboðsform-Útboðsyfirlit í útboðs- og samningsskilmálum verkefnisins.
Útboðsgögn verða til sölu á kr. 3500 hjá Ríkiskaupum, Borgartúni 7C, 105 Reykjavík frá og með miðvikudeginum 9. september 2015.
Tilboðin verða opnuð hjá Ríkiskaupum, þriðjudag 20. október 2015 kl 11:00 að viðstöddum þeim bjóðendum sem þess óska.
