Framsókn og flugvallarvinir vilja endurskoða skipulag í Úlfarsárdal og byggja þar litlar hagkvæmar búseturéttaríbúðir og leiguíbúðir fyrir félög sem eru rekin án hagnaðarsjónarmiða, þetta kemur fram í tilkynningu frá flokknum nú fyrir stuttu.
Segir í tillögu sem lögð var fram á fundi borgarráðs að mikil þörf sé litlum ódýrum íbúðum á markaðinn fyrir ungt fólk sem á ekki eigið fé, kemst ekki í gegnum greiðslumat og leigir langt umfram greiðslugetu. Hvetur flokkurinn til að skipulag Úlfarsársdals verði endurskoðað með það fyrir augum að útbúa lóðir fyrir fjölbýlishús þar sem gert verður ráð fyrir litlum hagkvæmum búseturéttaríbúðum og leiguíbúðum fyrir félög sem eru rekin án hagnaðarsjónarmiða. Hluti af íbúðunum yrðu fyrir Félagsbústaði.
Einnig er gerð krafa um að skoðað verði hvernig lækka megi byggingarkostnað við hönnun, útfærslu og byggingu húsanna. Bent er á að skoða mætti hvort hluti húsanna ætti að vera á tveimur hæðum með nokkrum íbúðum á hvorri hæð með tröppum utanhúss til að minnka sameign innan hússins og þar með stofn-, viðhalds- og rekstrarkostnað sameignar. Til að tryggja félagslega blöndun yrði hægt að líta til þekkingar og reynslu Búseta við útfærslu verkefnisins en félagið á og rekur bæði búseturéttaríbúðir og leiguíbúðir og í íbúðunum býr bæði fólk sem fellur undir og ekki undir eigna- og tekjumörk.
Tillaga Framsóknar og flugvallarvina lögð fram í borgarráði:
” Eins og kunnugt er vantar litlar ódýrar íbúðir fyrir ákveðinn hóp t.d. ungt fólk sem á ekki eigið fé, kemst ekki í gegnum greiðslumat og leigir langt umfram greiðslugetu. Því þarf að finna leiðir til að fjölga slíkum íbúðum t.d. leiguíbúðum og búseturéttaríbúðum sem yrðu í eigu félaga sem rekin eru án hagnaðarsjónarmiða. Því er lagt til að skipulag Úlfarsársdals verði endurskoðað þ. á m. þær lóðir sem nú er gert ráð fyrir einbýlishúsum eða parhúsum, með það fyrir augum að útbúa lóðir fyrir fjölbýlishús þar sem gert verður ráð fyrir litlum hagkvæmum búseturéttaríbúðum og leiguíbúðum fyrir félög sem eru rekin án hagnaðarsjónarmiða. Hluti af íbúðunum yrðu fyrir Félagsbústaði.
Skoðað verði hvernig lækka megi byggingarkostnað við hönnun, útfærslu og byggingu húsanna. T.d. mætti skoða hvort hluti húsanna ætti að vera á tveimur hæðum með nokkrum íbúðum á hvorri hæð með tröppum utanhúss til að minnka sameign innan hússins og þar með stofn-, viðhalds- og rekstrarkostnað sameignar þ. á m. kostnað við lyftu. Til að tryggja félagslega blöndun er t.d. hægt að líta til þekkingar og reynslu Búseta við útfærslu verkefnisins en félagið á og rekur bæði búseturéttaríbúðir og leiguíbúðir og í íbúðunum býr bæði fólk sem fellur undir og ekki undir eigna- og tekjumörk.“
Heimild: Pressan.is
