Nýr eigandi Valhallar hyggst breyta húsnæðinu í hótel.
Valhöll við Háaleitisbraut 1, höfuðstöðvar Sjálfstæðisflokksins og eitt þekktasta pólitíska kennileiti borgarinnar, er langt kominn í söluferli en búast við að gengið verði frá kaupunum á allra næstu dögum.
Kaupandi er Alva fasteignir ehf., sem hefur þegar lagt fram fyrirspurn til skipulagsfulltrúa Reykjavíkurborgar um að breyta notkun hússins úr skrifstofuhúsnæði í hótel.
Húsið var sett á sölu í nóvember og sagði Guðrún Hafsteinsdóttir formaður flokksins á þeim tíma að ástæðan fyrir sölunni væri einfaldlega sú að starfsemi stjórnmálaflokka sé allt önnur nú en þegar húsið var reist fyrir liðlega hálfri öld, en aðeins brot af því er í daglegri notkun.
Alva fasteignir er í 100% eigu Skorra Rafns Rafnssonar í gegnum félagið Alva Capital.
Í erindi Alva fasteigna hjá borginni er lagt upp með að 2.–4. hæð hússins verði nýtt undir gistingu, jafnframt að jarðhæð verði að hluta til með hótelherbergjum, og að matsalur og önnur þjónusta sem tengist hefðbundnum hótelrekstri verði í kjallara.
Þá var einnig óskað eftir afstöðu til þess að bæta við inndreginni þakhæð ofan á núverandi byggingu.
Skipulagsfulltrúi bendir á að þar sem húsið er skráð sem skrifstofubygging í fasteignaskrá og skilgreint sem þjónustubygging í gildandi deiliskipulagi þurfi deiliskipulagsbreytingu til að heimila hótelstarfsemi.
Samkvæmt Aðalskipulagi Reykjavíkur 2040 fellur hótelrekstur þó almennt að þeirri starfsemi sem heimil er á viðkomandi miðsvæði (M2b), þar sem meðal annars er gert ráð fyrir skrifstofum, þjónustu og hótelum.
Hins vegar er tekið neikvætt í að hækka húsið um eina hæð.
Í umsögninni er jafnframt lögð rík áhersla á varðveislugildi Valhallar: byggingin, sem reist var árið 1975 og hönnuð af Halldóri H. Jónssyni og Garðari Halldórssyni, er sögð einstök að því leyti að hún var sérhönnuð til að hýsa höfuðstöðvar stjórnmálaflokks og telst táknræn bygging á áberandi hornlóð.
Vísað er til þess að hún sé í rauðum flokki í byggðakönnun, sem jafnan er notaður um hús sem lagt er til að njóti verndar vegna byggingarlistarlegrar, menningarsögulegrar og umhverfislegrar sérstöðu.
Tekið er fram að afgreiðsla skipulagsfulltrúa á fyrirspurninni jafngildir ekki formlegri leyfisveitingu eða endanlegri niðurstöðu um framkvæmdir.
Næstu skref, verði verkefnið þróað áfram, myndu því fela í sér nánari útfærslu og formlegt ferli deiliskipulagsbreytingar – með tilheyrandi mati á áhrifum á ásýnd og verndargildi hússins.
Heimild: Vb.is
