Stækkunin eykur framleiðslugetu á raforku í Svartsengi um allt að þriðjung en framleiðslugetan er nú um 63MW.
Formleg gangsetning sjöunda orkuversins í Svartsengi fór fram í dag. Um er að ræða 55MW vélarsamstæðu sem jafnframt er stærsti gufuhverfill landsins.
Orkuver sjö leysir af hólmi tvö af eldri orkuverum HS Orku í Svartsengi, auk þess sem framkvæmdin felur í sér umtalsverðar endurbætur á ýmsum búnaði er tengist heitavatnsframleiðslu fyrirtækisins.
Stækkunin eykur framleiðslugetu á raforku í Svartsengi um allt að þriðjung en framleiðslugetan er nú um 63MW, að því er segir í tilkynningu HS Orku.
Áætlað er að kostnaður við stækkun og endurbætur orkuversins muni nema ríflega 14 milljörðum króna.
Mat Skipulagsstofnunar var að stækkunarframkvæmdin þyrfti ekki að undirgangast fullt mat á umhverfisáhrifum og sótti HS Orka um nýtt nýtingar- og virkjunarleyfi árið 2022 fyrir allt að 85MW framleiðslu á grundvelli þess. Uppsett heildarvélarafl Svartsengis getur því rúmað frekari stækkun svo fremi sem sjálfbærni jarðhitaauðlindarinnar er tryggð.
Áætlanir stóðust þrátt fyrir níu eldgos
Fyrsta skóflustungan að verkinu var tekin í árslok 2022 og stóðust allar verk- og tímaáætlanir, samkvæmt HS Orku.
„Jarðhræringar og eldgos á Sundhnúksgígaröðinni, sem hófust fyrir alvöru 10. nóvember 2023, settu mark sitt á verkefnið. Gosið hefur samtals níu sinnum í gígaröðinni á framkvæmdatímanum og gasmengun á svæðinu hefur ítrekað sett strik í reikninginn.“
Þannig var vinnusvæðinu lokað í um fjóra mánuði frá nóvember 2023 til mars 2024. Þrátt fyrir þetta tókst að ljúka verkefninu samkævmt upprunalegri tímaáætlun.
„Í ljósi náttúruhamfaranna sem gengið hafa yfir Reykjanes á framkvæmdatímanum, er það einstakt afrek að byggja þessa nýjustu virkjun Íslands þannig að allar áætlanir hafi staðist. Allir sem að verkefninu hafa komið eiga mikið hrós skilið, jafnt verktakar og ráðgjafar sem starfsfólk HS Orku,“ segir Tómas Már Sigurðsson, forstjóri HS Orku.
120 unnu að verkefninu þegar mest lét
Alls voru aðalverktakar í verkefninu þrír talsins: Ístak sá um byggingaframkvæmdir auk öryggis- og samræmingarmála á verkstað, Rafal sá um uppsetningu á rafbúnaði og HD um uppsetningu vélbúnaðar.
Fjöldi annarra verktaka og undirverktaka komu að verkinu; hönnun virkjunarinnar var í höndum Verkís og Arkitektastofunnar OG, verkfræðistofan Strendingur hélt um bygginga- og verkefnisstjórn mannvirkja, Lota fór með forritun á stjórnkerfi og Ellert Skúlason ehf. sá um jarðvinnu. Vélarsamstæðan, hverfill og rafall koma frá Fuji í Japan en starfsmenn á þeirra vegum hafa dvalist hér á landi allt þetta ár við uppsetningu og undirbúning gangsetningarinnar.
Þegar mest var unnu allt að 120 starfsmenn HS Orku og verktaka að verkinu á degi hverjum.
Orkuverið í Svartsengi er fyrsta blandaða jarðvarmavirkjunin á Íslandi en þar er framleidd raforka og heitt vatn. Virkjunin var reist undir merkjum Hitaveitu Suðurnesja, forvera HS Orku. Jarðvarmavinnsla hófst árið 1976 og var orkuverið síðar byggt upp í sex áföngum á ríflega þremur áratugum. Nú hefur sjöundi áfanginn verið tekinn í notkun.
Heimild: Vb.is
