Vegagerðin skoðar hvort hækka þurfi varnargarða við Jökulsá í Lóni þar sem hringvegur fór í sundur í liðinni viku. Almennri viðgerð er lokið en enn á eftir að malbika veginn.
Almennri viðgerð á Hringveginum við Jökulsá í Lóni er lokið. Vegurinn fór í sundur á 150 metra kafla í miklu vatnaveðri á föstudag skammt frá brú yfir ána.
Veginum var lokað á föstudag og á laugardag var unnið að viðgerð. Vegurinn var opnaður að nýju fyrir umferð síðdegis á laugardag.
Allir verktakar með mannskap og tæki kallaðir til
Loftur Þór Jónsson, svæðisstjóri Vegagerðarinnar á austursvæði, segir viðgerðarvinnu um helgina hafa gengið greiðlega. Unnið hafi verið sleitulaust allan laugardaginn svo hægt væri að opna að nýju.
„Þetta gekk mjög vel, enda voru bara allir verktakar á svæðinu kallaðir til sem að höfðu mannskap og tæki til að vinna.“
RÚV / Rúnar Snær Reynisson
Hann segir malbiksvinnu fram undan á allra næstu dögum. Þá sé einnig til skoðunar hvort hækka þurfi varnargarða við brúna ofan vegarins. Gólfið undir brúnni er í 26 metra hæð og til skoðunar sé hvort hækka eigi garðana í 25,9.
„Þannig að þeir rofni fyrst. Það er að þeir verði ekki það háir að brúin fari að taka það. Það er það sem við erum hræddir við.“
Heimild: Ruv.is
