Veitur ætla ekki að hefja framkvæmdir í sumar til stækkunnar á afgirtu svæði utan um vatnsvernd fyrirtækisins í Heiðmörk líkt og til stóð. Hins vegar stendur til að framkvæmdir hefjist fyrir áramót.
Framkvæmdirnar eru mjög umdeildar og hafa Skógræktarfélag Reykjavíkur og útivistarfélög meðal annars gagnrýnt framkvæmdina harðlega og sagt hugmyndir Veitna takmarka að óþörfu aðgengi borgarbúa að útivistarsvæðinu. Ljóst er að þær munu meðal annars breyta vinsælli gönguleið í Heiðmörk og girða af helsta útsýnisstað svæðisins.
Er þetta annað af tveimur aðgengismálum í Heiðmörk sem deilt hefur verið um undanfarið, en hitt varðar mögulega lokun á umferð um stóran hluta útivistarsvæðisins.
Veitur staðfesta að framkvæmdunum hafi verið frestað í skriflegu svari við fyrirspurn mbl.is vegna málsins.
Fara átti í framkvæmdirnar að kröfu heilbrigðiseftirlits Reykjavíkur þar sem brunnsvæði eiga samkvæmt reglum að vera að fullu afgirt, en aðeins hluti svæðisins er nú girtur.
Málið var tekið fyrir á fundi borgarstjórnar í júní þar sem tillögu um stofnun stýrihóps með til þess að móta framtíðarsýn um Heiðmörk var vísað frá. Sagði meirihlutinn málið vera í skýrum farvegi á vettvangi umhverfis- og skipulagsráðs.
Færa á Ríkishringinn
Fyrirtækið áformar að hefja framkvæmdir fyrir áramót, en þá verður fyrst lagður nýr göngu- og hjólastígur til að tryggja að útivistarfólk verði ekki fyrir skerðingu.
Hluti Ríkishringsins, vinsæls stígs í Heiðmörk, mun liggja innan hinnar fyrirhuguðu girðingar og verður hann því færður áður en girðingavinna hefst.
Líkt og fram kom á fjölmennu málþingi um framtíð Heiðmerkur sem útivistarsvæðis fyrir íbúa höfuðborgarsvæðisins í byrjun sumars mun færsla á gönguleiðinni loka á besta útsýnisstað Heiðmerkur, en það eru hæðirnar fyrir ofan Myllulækjartjörn.
Gagnrýndu fundarmenn þar harðlega samskiptaleysi Veitna og töldu þeir að þær forsendur sem Veitur settu fram væru ósannfærandi. Var veitufyrirtækið jafnframt sakað um yfirgangssemi og eineltistilburði og að reyna að koma sér hjá samtali við borgarbúa þegar kæmi að þessu hagsmunamáli, en auk breytinganna á gönguleiðinni horfa Veitur til þess að loka fyrir umferð ökutækja um stóran hluta Heiðmerkur.
Meðal þeirra sem gagnrýnt hafa þessi áform eru tveir fyrrverandi borgarstjórar, þau Ingibjörg Sólrún Gísladóttir, sem nú situr í stjórn Skógræktarfélags Reykjavíkur, og Einar Þorsteinsson, borgarfulltrúi Framsóknarflokksins.
Óljóst hvenær framkvæmdir hefjist
Afgirta svæðið mun að lokinni stækkun ná til um þriggja prósenta af heildarflatarmáli Heiðmerkur, en er nú tvö prósent. Óljóst er hvenær sjálfar framkvæmdirnar hefjast þar sem þær eru háðar útgáfu framkvæmdaleyfis frá Reykjavíkurborg.
Í svarinu kemur fram að Veitur taka jafnframt þátt í vinnu við nýtt deiliskipulag Heiðmerkur ásamt Reykjavíkurborg og Skógræktarfélagi Reykjavíkur. Þar er meðal annars skoðuð staðsetning bílastæða og hvernig takmarka megi gegnumakstur án þess að gestir þurfi að ganga langar leiðir til að komast að útivistarsvæðinu.
Ítreka Veitur í svarinu að fyrirtækið leggi áherslu á að tryggja hreint neysluvatn til framtíðar en jafnframt að Heiðmörk haldi áfram að vera útivistarparadís.
Heimild: Mbl.is
