Fyrsta byggingin sem risin er í Orkureitnum, nýju hverfi við Laugardalinn, hefur hlotið Svansvottun 4 en byggingin er sú fyrsta sem hlýtur vottunina á öllum Norðurlöndunum. Þetta kemur fram í tilkynningu frá SAFÍR byggingafélagi og Svaninum.
Nýja Svansvottunin var veitt SAFÍR, sem er eigandi og umsjónaraðili Orkureitsins, við formlega athöfn á dögunum.Stefnt er að því að aðrar byggingar í hverfinu hljóti Svansvottun 4 sömuleiðis.
Svansvottun 4 er nýr staðall sem gerir talsvert meiri kröfur en eldri staðall 3. Kröfurnar snúa að því að skapa heilnæmara og öruggara umhverfi fyrir fólk, meðal annars með kröfum til dagsbirtugæða, rakaöryggis, heilnæmara efnisvals og betri innivistar fyrir íbúa.
„Mikill sigur að vera fyrst á Norðurlöndunum“
„Viðmið Svansins eru hert reglulega til að samræmast þeirri tækni og þróun sem byggist upp á markaðinum hvað varðar umhverfismál,“ segir Bergþóra Kvaran, sérfræðingur hjá Umhverfis- og Orkustofnun, í tilkynningunni. „Það er því virkilega mikill sigur að vera fyrst á Norðurlöndunum til að hljóta Svansleyfi samkvæmt þessum nýju viðmiðum.“
Hún segir gríðarleg tækifæri til að gera betur í stórum verkefnum sem þessum. SAFÍR hafi sýnt frumkvæði með því að ákveða að Svansvotta og byggja á BREEAM-vottuðum reit þar sem tekið sé á þeim fjölmörgu atriðum sem skipti máli þegar komi að umhverfismálum. ,,Í þessu verkefni hefur verið hugað að innivist, losun gróðurhúsalofttegunda, hringrásarhagkerfinu, líffræðilegum fjölbreytileika og mörgu öðru,“ er haft eftir Bergþóru í tilkynningu.
Heimild: Mbl.is
