Ekki hafa borist tilboð enn sem komið er í húseignir Landsbankans í miðborginni, sem auglýstar voru í Morgunblaðinu 15. maí síðastliðinn. Þetta upplýsir Rúnar Pálmason upplýsingafulltrúi bankans.
Ráðgert var að ríkið keypti Landsbankahúsið í Austurstræti en þegar til kom þótti það ekki henta starfsemi á vegum hins opinbera og ekkert varð af kaupunum.
Landsbankinn flutti árið 2023 starfsemi sína úr alls 12 húsum við Austurstræti, Hafnarstræti og Tryggvagötu yfir í ný húsakynni við Reykjastræti 6.
Það var hinn 29. september 2022 að tilkynning birtist á vef Stjórnarráðs Íslands um að undirritaður hefði verið samningur um kaup ríkisins á Norðurhúsi við Austurbakka af Landsbankanum. Um var að ræða tæplega 6 þúsund fermetra byggingu sem ætluð var ráðuneytum.
Heimild: Mbl.is
