Vegagerðin og Verkefnastofa borgarlínu hafa lagt fram ítarlega umhverfismatsskýrslu um fyrstu lotu borgarlínunnar sem jafnframt er stærsta lotan.
Hún er um 15 km löng og liggur milli Ártúnshöfða í Reykjavík og Hamraborgar í Kópavogi. Framkvæmdin felur í sér að útbúa rými fyrir borgarlínuvagna á þessari leið, helst sérrými, en einnig rými fyrir aðra virka ferðamáta. Að auki verða útbúnar nýjar stöðvar á völdum stöðum. Samkvæmt frumdrögum er gert ráð fyrir 26 stöðvum, en það kann að breytast.
Fram kemur í skýrslunni að borgarlínan verði lögð í sex lotum. Tilgangur framkvæmdanna í heild sé að útbúa sérrými fyrir almenningssamgöngur, en einnig að byggja upp göngu- og hjólastíga meðfram leiðinni, breyta götusniði, aðlaga gatnamót og byggja nýjar brýr yfir Fossvog og Elliðaárvog, mæta fjölgun íbúa og ferðamanna án þess að álag á stofnvegakerfið aukist í sama hlutfalli. Borgarlínan hafi mikla flutningsgetu og mun meiri en aðrir samgöngumátar á höfuðborgarsvæðinu.
Framkvæmdir í sjö ár
Áætlað er að uppbygging fyrstu lotu borgarlínunnar taki í heild um sjö ár. Er miðað við að framkvæmdir hefjist í byrjun næsta árs og þeim ljúki í lok árs 2031. Í skýrslunni segir þó ljóst að áætlunin eigi eftir að taka breytingum þegar líður á og hún sé því sett fram einungis til að gefa grófa hugmynd.
Nánari umfjöllun er að finna í Morgunblaðinu í gær, laugardag.
Heimild: Mbl.is
