Nýr Gjögurviti er risinn á Ströndum og farinn að lýsa sjófarendum veginn. Tæplega ár er síðan gamli vitinn, sem reistur var árið 1921, féll í hvassviðri 15. desember í fyrra. Um tíma lá ekki fyrir hvort nýr viti yrði reistur í stað þess gamla.
Rafvirkjar og tæknimenn frá Vegagerðinni komu ljósabúnaði fyrir í mastri nýja vitans í gær. Jón Guðbjörn Guðjónsson, vitavörður á Gjögri, segir að vinna hafi staðið frá morgni og fram á kvöld í leiðindaveðri.
Nýi vitinn er 24 metra hár og samanstendur af þrífættu mastri með þjónustustiga, LED vitaljósi og radarsvara. Gamli vitaskúrinn hefur verið málaður rauður.
Heimild: Ruv.is
