Úrskurðarnefnd umhverfis- og auðlindamála hefur kveðið upp úrskurð í máli þar sem eigandi hluta fjöleignarhúss í Kópavogi fór fram á tímabundna stöðvun framkvæmda sem eigandi annars hluta eignarinnar stóð fyrir en þær fólust meðal annars í því að rífa niður vegg og breyta neysluvatns- og hitalögnum.
Vildi kærandinn í málinu að framkvæmdirnar yrðu stöðvaðar á meðan nefndin myndi kanna lögmæti þeirra en ekki var orðið við kröfunni.
Hinn ósátti eigandi á tvo matshluta í viðkomandi fasteign en sá sem fyrir framkvæmdunum stóð á einn hluta. Byggingarfulltrúi Kópavogsbæjar veitti hinum síðarnefnda leyfi til að breyta innra fyrirkomulagi 3. hæðar hússins og gera breytingar á neysluvatns- og hitalögnum.
Framkvæmdirnar snúast um að færa til herbergi, rífa niður vegg og gera lítilsháttar breytingar á neysluvatns- og hitalögnum. Byggingarfulltrúinn gaf út byggingarleyfi 7. ágúst síðastliðinn.
Hinn ósátti eigandi sem kærði framkvæmdirnar sagði að samþykki hans hefði þurft fyrir framkvæmdunum, í samræmi við ákvæði laga um fjöleignarhús.
Vildi hann meina að burðarveggir séu séreign fjöleignarhúss og ef átt sé við burðarvirki þurfi samþykki allra eigenda. Fullyrti hann einnig að samkvæmt lögunum hafi einnig þurft samþykki hans fyrir tilfærslu á herbergjunum og breytingum á neysluvatns- og hitalögnum, Sagði hann að byggingarfulltrúinn hefði tekið undir þetta.
Of langt komnar
Eigandinn sem stenddur fyrir framkvæmdunum sagði meðal annars í sínum andsvörum að kæran hefði komið fram of seint. Vísaði hann einnig í lög um æurskurðarnefnd umhverfis- og auðlindamála og sagði að samkvæmt þeim verði framkvæmdir að vera yfirvofandi eða hafnar til að hægt sé að stöðva þær en að umræddum framkvæmdum sé að stórum hluta lokið.
Nefndin minnti á að í lögum um hana sjálfa sé tekið fram að kæra fresti ekki réttaráhrifum hinnar kærðu ákvörðunar nema að veigamiklar ástæður liggi þar að baki.
Sagði nefndin að slíkar ástæður væru ekki fyrir hendi í þessu máli. Framkvæmdunum sé að mestu leyti lokið en þær séu afturkræfar og því sé ekki þörf á því að stöðva þær tímabundið á meðan nefndin tekur málið fyrir til að skera úr um lögmæti framkvæmdanna.
Tekur nefndin þó sérstaklega fram að eigandinn sem stendur fyrir framkvæmdunum muni bera áhættu af úrslitum kærumálsins kjósi hann að halda framkvæmdunum áfram áður en niðurstaða nefndarinnar um lögmæti þeirra liggur fyrir.
Heimild: Dv.is
