Tilefni er til þess að hafa áhyggjur af því að hraun geti náð inn fyrir varnargarða við Grindavík í næsta eldgosi. Veðurstofan hefur uppfært hættumat vegna jarðhræringa á Reykjanesskaga, sem er óbreytt frá síðustu viku.
Þetta kemur fram í tilkynningu frá lögreglustjóranum á Suðurnesjum.
Áfram eru miklar líkur á kvikuhlaupi og jafnvel eldgosi á Sundhnúksgígaröðinni, og skjálftavirkni vex dag frá degi. Skýr merki séu um að þrýstingur sé að aukast á svæðinu.
Þá segir að hraun geti náð inn fyrir varnargarðana.
„Þannig er möguleiki á að hraun sem kæmi upp úr gosopi norðan varnargarða ofan bæjarins geti leitað ofan í sprungukerfi sunnan Hagafells og leitt hraunstraum inn fyrir bæjarmörkin. Þá er ekki hægt að útiloka að gossprunga geti opnast inn í Grindavík,“ segir í tilkynningunni.
Mæla alls ekki með því að fólk dvelji í bænum
Lögreglustjórinn tekur skýrt fram að Grindavík er ekki staður fyrir barnafólk eða börn að leik, og mælir alls ekki með því að íbúar dvelji í bænum. Þá er svæðið austan Víkurbrautar og norðan Austurvegar merkt með óásættanlegri áhættu og tilmæli frá lögreglustjóra eru að enginn dvelji þar að næturlagi.
Lögreglan á Suðurnesjum
Fáir kjósa að dvelja í bænum næturlangt, en dvalið var í 22 húsum síðastliðna nótt.
Grindavík er lokuð öllum öðrum en viðbragðsaðilum, íbúum bæjarins, starfsmönnum Grindavíkurbæjar, fyrirtækja, verktökum og þeim sem þurfa að aðstoða íbúa.
Heimild: Visir.is
