Nesbræður ehf áttu lægsta tilboð í gerð göngu-hjólastígs frá afleggjara upp að Hömrum og inn í Kjarnaskóg til suðurs. Tilboð Nesbræðra hljóðaði upp á tæplega 33,3 milljónir króna.
Umhverfis- og mannvirkjaráð hefur samþykkt að ganga til samninga um verkefnið, en þrjú tilboð bárust í það. Auk Nesbræðra buðu fyrirtækin Finnur ehf og Þverá Golf í verkið.
Þetta er seinni áfangi verksins, en sá fyrri var stígur sem liggur frá Naustahverfi, Kjarnagötu og að Hömrum.
Jónas Valdimarsson verkefnastjóri hönnunar á umhverfis- og mannvirkjasviði segir að hugmyndin sé að hefja stígagerðina og ljúka verkinu með lagfæringum á gatnamótum Kjarnavegar/Hamravegar. Stígurinn verður malbikaður frá Hamraafleggjara og að Kjarnaskógi.
„Um leið og við erum komin inn í skóginn breytist hann í sallastíg, en þar er slíkur stígur fyrir sem verður lagfærður,” segir Jónas. Einnig verða ljósastaurar settir upp alla leið inn í skóginn.
Áætlað er að ljúka verkinu fyrir næsta vetur.
Heimild: Vikufrettir.is
