![24.05.2024 Merkum áfanga fagnað í verslun BYKO á Selfossi](https://byggingar.is/wp-content/uploads/2024/05/24.05.2024-Merkum-afanga-fagnad-i-verslun-BYKO-a-Selfossi-640x427.jpg)
BYKO fagnaði nýverið þeim áfanga að framkvæmdum lauk vegna breytinga á uppsetningu verslunar fyrirtækisins á Selfossi. Við þetta tækifæri ávarpaði Sigurður B. Pálsson forstjóri BYKO gesti og fór yfir tilganginn með þessum breytingum.
Sigurður sagði þetta vera fyrsta áfanga af mörgum í fimm ára vegferð sem fyrirtækið hefur nú lagt upp í til að breyta ásýnd og uppsetningu verslana sinna og tala þannig beint inn í loforð BYKO um einfaldleika og hraða.
Með þessum breytingum sé jafnframt verið að ná fram aðgreiningu milli ólíkra hópa viðskiptavina en Sigurður segir það hafa komið skýrt fram í samtölum við fagaðila að hraði, einfaldleiki og það að varan sé alltaf til séu ráðandi þættir í heildarupplifun þess hóps.
„Þessi vegferð okkar byggir á vel ígrundaðri stefnumótunarvinnu sem var unnin á árunum 2021 og 2022, þar sem allt starfsfólk kom að borðinu ásamt fjölda af okkar viðskiptavinum.
Okkar framtíðarsýn snýr að því að skapa bestu heildarupplifun viðskiptavina, hvort sem um er að ræða fagaðila í framkvæmdum eða einstaklinga og fjölskyldur í framkvæmdum og fegrun heimilisins.
Markmið BYKO er að mæta viðskiptavininum þar sem hann er, sem þýðir að metnaður okkar liggur í því að viðskiptavinir okkar eiga ekki að hafa neina ástæðu til að leita annað.
Okkar loforð er: það er einfaldast að versla í BYKO og hlutverk okkar er að sjá til þess að viðskiptavinum gangi vel í þeim verkefnum sem þau eru að fást við,“ segir Sigurður.
Í næsta mánuði fagnar BYKO á Selfossi 20 ára farsælli rekstrarsögu en verslunin opnaði þann 26. júní 2004.
Í ávarpi sínu þakkaði forstjórinn viðskiptavinum verslunarinnar sérstaklega fyrir þá tryggð sem þeir hafa sýnt BYKO í þessa tvo áratugi og hvatti þá til áframhaldandi samtals og ábendinga til starfsfólk svo að sem best megi uppfylla þeirra þarfir og væntingar.
Enn fremur þakkaði Sigurður samstarfsfólki og verktökum fyrir þeirra framlag við þessar breytingar sem voru mikil áskorun ofan í opnunartíma og daglegan rekstur verslunarinnar.
Heimild: Visir.is