Unnið er á fullu að því að fjarlægja brak Francis Scott Key-brúarinnar í Baltimore sem hrundi á þriðjudaginn. Fyrsti hlutinn um 200 tonn að þyngd, hefur verið fjarlægður.
Vinnuflokkar við Francis Scott Key-brúna í Baltimore hófust í síðustu viku handa við að fjarlægja hluta af brúnni sem hrundi að hluta til eftir að flutningaskip sigldi á hana..
Skipaumferð inn á hafnarsvæðið í Baltimore hefur legið niðri síðan brúin hrundi í Patapsco-fljótið aðfaranótt þriðjudags eftir að flutningaskipið Dali sigldi á eina af stoðum brúarinnar. Sex verkamenn létust þegar brúin hrundi.
Um 200 tonna hluti af brúnni hefur verðið skorinn af, en partarnir eru settir á pramma og svo fluttir á brotajárnsmóttöku.
Dali situr enn fast á sínum stað, enda liggur hluti af brúnni enn á stafni skipsins sem er botnfast.
Vonast er til þess að lík mannanna fjögurra sem enn er saknað komi í ljós þegar brakið verður fjarlægt, en verkið er afar vandasamt og hættulegt.
Wes Moore, ríkisstjóri Maryland, sagði í gær að leit að mönnunum væri í algjörum forgangi áður en höfnin yrði opnuð á ný.
Hafnarsvæðið í Baltimore er eitt það stærsta á austurströnd Bandaríkjanna og helsta flutningamiðstöð fyrir bíla og vinnutæki.
Pete Buttigieg, samgönguráðherra Bandaríkjanna, sagði í viðtali á CBS-sjónvarpsstöðinni í gær að enginn tímarammi væri á aðgerðunum eða opnun hafnarinnar.
„Það þarf mikið til að passa að brúin sé tekin í sundur á öruggan hátt og að skipið færist ekki úr stað og reki út í sundið. En það þarf að gera,“ sagði ráðherrann.
Heimild: Ruv.is
