Upplýsingum um íbúðir fyrir Grindvíkinga verður safnað á sérstakan vef og þær auglýstar á leigutorgi. Þetta er meðal úrræða hins opinbera fyrir bæjarbúa sem þurftu að yfirgefa heimili sín fyrir tæpum mánuði. Óvíst er hvenær óhætt er að snúa aftur.
Framkvæmdasýslan-Ríkiseignir auglýsir eftir fasteignum til tímabundinnar leigu fyrir Grindvíkinga á Suðurnesjum, höfuðborgarsvæðinu og nágrannasveitarfélögum.
Þetta er sagt hluti af húsnæðisstuðningi við bæjarbúa og er unnið í samráði við Grindavíkurbæ, fjármála- og efnahagsráðuneytið, forsætisráðuneytið og innviðaráðuneytið.
Frá þessu er greint á vef Stjórnarráðsins þar sem segir að eignirnar þurfi að vera lausar til leigu í minnst þrjá mánuði og tilbúnar til notkunar hið fyrsta. Upplýsingum um eignir verður safnað á sérstakan vef og þær auglýstar á leigutorgi.
Torgið er eingöngu ætlað fólki sem á lögheimili í Grindavík en leigusamningar verða gerðir án aðkomu hins opinbera.
Í seinustu viku kom fram að ekki er talið öruggt að snúa aftur til Grindavíkur fyrr en landrisi linnir undir Svartsengi og í kringum kvikuganginn sem meðal annars liggur undir bænum.
Heimild: Ruv.is
