Heilbrigðisráðherra vígði fyrr í mánuðinum nýtt hjúkrunarheimili á gömlum merg í Stykkishólmi. Nafnið felur í sér vitnisburð um liðna tíð.
Willum Þór Þórsson heilbrigðisráðherra vígði fyrr í mánuðinum nýtt hjúkrunarheimili í Stykkishólmi. Heimilið er í byggingu St. Franciscusspítala, sem byggður var af nunnum samnefndrar reglu árið 1936. Hjúkrunarheimilið er rekið af Heilbrigðisstofnun Vesturlands, HVE. Forstjóri HVE er Jóhanna Fjóla Jóhennesdóttir.
Verkefnið kom fyrst inn á borð FSRE árið 2012. Það var þó ekki fyrr en í maí 2018 sem Sturla Böðvarsson þáverandi bæjarstjóri Stykkishólmsbæjar og Svandís Svavarsdóttir þáverandi heilbrigðisráðherra undirrituðu samning um byggingu heimilisins.
FSRE hófst síðar sama ár handa við að hanna 18 rýma hjúkrunarheimili í húsinu, sem nú er tilbúið. Íbúar hafa þegar flutt inn og ríkir almenn ánægja með aðstöðuna.
Við athöfnina í dag tilkynnti Hrefna Frímannsdóttir staðarstjóri HVE í Stykkishólmi að heimilið hefur hlotið nafnið Systraskjól. Nafnið vísar í að gamli spítalinn sem heimilið er í var byggður af systrum St. Franciscusreglunnar og rekinn af þeim í áratugi.
Heimild: Fsre.is
