Veggjalús er orðin mjög algeng hér á landi. Meindýraeyðir fer sífellt oftar í heimahús að eitra fyrir lúsinni sem skríður upp í rúm til fólks á nótunni til að nærast.
Fæstir vilja fá veggjalýs í heimsókn en þær eru meðal hvimleiðustu skordýra sem komast inn á heimilið. Steinar Smári Guðbergsson meindýraeyðir segist ekki hafa undan að eitra. Tilfelli hafi komið upp í öllum landshlutum að Vestfjörðum undanskildum.
„Þetta voru svona eitt til þrjú skipti á viku fyrir ári síðan en í síðustu viku voru sjö,“ segir Steinar.
Flest útköllin eru á gististaði en lúsin verður sífellt algengari í heimahúsum. Hún nærist eingöngu á blóði og heldur sig jafnan nærri svefnstöðum. Steinar segir aukin ferðalög vera ástæðu fyrir því sem hann kallar veggjalúsafaraldur. Erfitt er að koma í veg fyrir að lúsin berist inn á heimili en gott er að hafa nokkur atriði í huga þegar fólk er á ferðalagi.
„Aldrei að setja tösku upp í rúm á hótelum og helst ekki þar sem farangursstandurinn er. Lúsin getur leynst þar líka. Settu töskuna bara inn á bað eða í sturtuna og vertu taugaveikluð fyrstu eina tvær næturnar,“ bætir Steinar við.
RÚV
Finnast víða
Hreinlæti hefur ekkert að segja til um hvort veggjalúsin geri sig heimakæra. Þær geta leynst í glufum í tréverki, rúmgöflum, niður með rúmdýnum, í fellingum meðfram saumum, undir gólflistum, á bak við myndir og annað á veggjum.
Á nóttunni skríða þær svo úr fylgsnum sínum yfir í rúmið till okkar til að nærast. Steinar segist hafa séð afar slæm tilfelli hérlendis. Eitt þeirra var á hótel fyrir stuttu síðan.
„Við lyftum upp rúmbotninum og töldum í fljótu bragði undir rúminu og á rúminu sjálfu, 400-500 stykki. Við sáum náttúrulega alls ekki allt. Það voru líka helling af dauðum lýsum á gólfinu. Það var svollítið mikið.“
Geta lifað í meira en ár án fæðu
Veggjalýs eru seigar og geta lifað í þónokkurn tíma án fæðu. Tíminn veltur meðal annars á aldri en eldri veggjalýs geta komist af í allt að 18 mánuði án þess að fá blóð.
Heimild: Ruv.is
