Útlit er fyrir vaxandi spennu á íbúðamarkaði enda heldur framboð ekki í við eftirspurn. Þá ekki síst í félagslega kerfinu.
Biðlisti eftir hagkvæmum íbúðum hjá Bjargi íbúðafélagi hefur lengst um 50% á einu ári og eru nú 3.000 manns á biðlista. Hver íbúð hjá Bjargi kostar um 45 milljónir í byggingu og myndi því kosta 135 milljarða að útvega fólkinu á biðlistanum nýjar íbúðir.
Tvö metár í röð
Björn Traustason framkvæmdastjóri Bjargs segir aðspurður að biðlistar eftir hagkvæmum íbúðum haldi áfram að lengjast að óbreyttu.
Við þetta bætist aukin húsnæðisþörf vegna aðflutnings fólks til landsins. Árið í fyrra var metár í því efni en þá fluttust 10.300 fleiri erlendir ríkisborgarar til landsins en frá því. Gerir fjármálaráðuneytið ráð fyrir því að fjöldinn verði ekki minni í ár.
Hagfræðingar ASÍ víkja að þessari þróun í nýrri hagspá. Að mati þeirra hefur ekki tekist að stuðla að auknu framboði til að mæta lýðfræðilegri þróun og aukinni fólksfjölgun. Það misræmi eigi þátt í sögulega háu íbúðaverði síðustu misseri. Útlit sé fyrir að draga muni úr uppbyggingu íbúða á næsta ári og því séu minnkandi líkur á að áform um 35 þúsund nýjar íbúðir á næstu 10 árum rætist.
„Því er hætta á að framboðstregða muni áfram setja þrýsting til hækkunar leigu- og eignaverðs,“ skrifa þeir.
Ekki nægt lóðaframboð
Elmar Erlendsson, framkvæmdastjóri lánasviðs hjá HMS, tekur í sama streng og segir skort á lóðum hamla uppbyggingu íbúða. Það birtist meðal annars í því að stofnframlög til að byggja hagkvæmt húsnæði hafi ekki verið fullnýtt í fyrra.
Ef jafnmargir flytja til landsins í ár og í fyrra gæti íbúafjöldinn farið í 400 þúsund í fyrsta sinn í sögu landsins. Það yrði fjölgun um 24 þúsund manns frá ársbyrjun 2022 sem aftur kallar á yfir 10 þúsund íbúðir. Þótt manntal Hagstofunnar 2021 bendi til að íbúafjöldinn kunni að vera ofmetinn er engu að síður ljóst að íbúum landsins fjölgar ört.
Heimild: Mbl.is
