Borgarráð hefur samþykkt að selja Alliance-húsið að Grandagarði 2 til Arcus ehf. á 880 milljónir.
Borgarráð hefur samþykkt að selja Alliance-húsið að Grandagarði 2 til Arcus ehf., félags í eigu Þorvaldar Gissurarsonar, eiganda ÞG verks. Réttur til uppbyggingar á lóðinni fylgir með kaupunum. Greint er frá þessu í Morgunblaðinu í dag.
© BIG (VB MYND/BIG)
Arcus áformar að reisa á lóðinni Hótel Jón forseta, íbúðarhús og koma upp saltfisksetri í Alliance-húsinu.
Alliance-húsið var friðað af menntamálaráðherra í febrúar 2010 og nær friðunin til ytra borðs aðalhúss. Húsið var reist á árunum 1924-1925 til að hýsa starfsemi útgerðarfyrirtækisins Alliance sem var stofnað af Thor Jensen og fleirum. Guðmundur H. Þorláksson, húsasmiður teiknaði húsið.
Reykjavíkurborg festi kaup á Grandagarði 2 árið 2012 fyrir 340 milljónir króna. Í dag er starfrækt í húsinu Sögusafnið og veitingastaðurinn Matur og drykkur ásamt því að nokkrir listamenn hafa aðstöðu á efri hæðum hússins.
Fasteignin að Grandagarði 2 er skráð 2.701 fermetri á þremur hæðum. Í viðbyggingu er rekið norðurljósasetur.
Viðbótarbyggingamagn á lóðinni er samkvæmt skipulaginu 5.593 fermetrar. Þar af eru 4.193 fermetrar ofanjarðar.
Heimild: Vb.is
