Skrifað var undir verksamning milli Hrunamannahrepps og fyrirtækisins Gröfutækni ehf. í dag. Þar með er hafin uppbygging á fyrsta áfanga íbúðahverfisins Byggða á Bríkum á Flúðum. Alls verða byggðar 25 íbúðir.
Áætlað er að framkvæmdir hefjist í byrjun janúar og vinnst verkefnið í tveimur áföngum. Sá fyrri felur í sér gerð á nýjum götum í hverfum og sá seinni í umfangsmikilli vinnu við tengingu lagna innan hverfisins. Verklok fyrsta áfanga eru þann 15. júlí árið 2023.
Nýja íbúðahverfið mun liggja að svæði golfvallarins á Flúðum að Efra Seli. Í þessum fyrsta áfanga mun tveimur fjögurra íbúða raðhúsum, tveimur þriggja íbúða raðhúsum, fjórum parhúsum og þremur einbýlishúsum vera úthlutað.
„Það er ljóst að beðið hefur verið eftir lóðum á þessum eftirsóknarverða stað, þar sem veðrið er ávallt með besta móti, stutt er í helstu náttúruperlur þjóðarinnar auk þess sem víðerni hálendisins er innan seilingar auk góðrar þjónustu þéttbýlisins á Flúðum.
Verði eftirspurn eftir lóðum meiri en hægt er að verða við er heimild í útboðinu til þess að ráðist verði strax í gerð annarrar götu og sem gefur þá möguleika á nær tvöfalt fleiri íbúðum í fyrsta áfanga,“ segir í tilkynningu frá Hrunamannahreppi.
Heimild: Visir.is
