Fjárfestingafélagið Kaldbakur hefur fest kaup á Landsbankahúsinu sem auglýst var til sölu í október. Sjö tilboð bárust og var tilboð Kaldbaks hæst, en það var 685 milljónir króna.
Tilkynnt var um kaupin á heimasíðu Samherja. Í henni kemur fram að Landsbankahúsið sé 2400 fermetrar og það hafi fyrst verið tekið í notkun árið 1954.
„Landsbankahúsið stendur í hjarta miðbæjarins og er sögulega í stóru hlutverki. Kaldbakur vill leggja sitt að mörkum til að varðveita húsið og glæða það lífi til framtíðar,“ segir Eiríkur S. Jóhannsson framkvæmdastjóri fjárfestingafélags Kaldbaks.
„Kaupin á Landsbankahúsinu veitir Kaldbaki kærkomið tækifæri til að taka þátt í uppbyggingu miðbæjarins og styrkja þannig mikilvægt hlutverk Akureyrar. Þess vegna er um að ræða góða fjárfestingu sem er jú megin ástæða þessara kaupa,“ segir hann.
Lilja Björk Einarsdóttir bankastjóri Landsbankans segir þrjátíu manns starfa í útibúi Landsbankans í dag en þrátt fyrir að útibúið sé stórt og öflugt sé það of stórt fyrir starfsemina.
„Okkur líst því vel á áform nýrra eigenda um að glæða húsið nýju lífi og möguleikarnir eru svo sannarlega til staðar. Við munum vera áfram í húsinu um tíma en erum farin að líta í kringum okkur eftir nýju húsnæði í bænum þar sem við munum áfram veita viðskiptavinum okkar á Akureyri og nágrenni framúrskarandi bankaþjónustu,“ segir Lilja.
Fyrstu tillöguuppdrætti að húsinu gerði Guðjón Samúelsson en að honum látnum tók Bárður Ísleifsson við og gerði hann eftir það alla uppdrætti. Bárður gerði einnig teikningar að mögulegri viðbyggingu á austurhlið hússins sem ekki reis.
Heimild: Frettabladid.is
