Home Fréttir Í fréttum 700 komust ekki í iðnnám þegar iðnaðarmenn vantar

700 komust ekki í iðnnám þegar iðnaðarmenn vantar

96
0
Mynd: Birgir Þór Harðarson - RÚV
Hlutfallslega vantar flest starfsfólk í byggingarstarfsemi og mannvirkjagerð hér á landi, að því er fram kemur í nýrri Hagsjá Landsbankans. Formaður Sambands iðnfélaga segir þörf á átaki í menntakerfinu svo fleiri geti menntað sig í iðngreinum.

Laus störf í byggingariðnaði hafa frá árinu 2019 verið 6,4% að meðaltali, sem eru um eitt þúsund störf. Í hagsjá Landsbankans segir að greinin skeri sig frá annarri starfsemi að því leyti að litlar sviptingar hafa verið og vantað hafi töluverðan fjölda til starfa allt tímabilið.

Mikill skortur er á íbúðum um nær allt land og sérstaklega vantar húsnæði á höfuðborgarsvæðinu. Starfshópur á vegum forsætisráðherra lagði til í síðustu viku að til þess að mæta eftirspurn yrðu byggðar um 3-4000 íbúðir á ári, næstu tíu ár.

Hilmar Harðarsson, formaður sambands iðnfélaga, segir það skjóta skökku við að biðlistar séu í nám í iðngreinum þegar það bráðvanti menntaða iðnaðarmenn til starfa.

„Á síðasta ári voru um það bil 700 nemar sem komust ekki inn í iðnskóla. Oft eru það menn sem eru þá hálfnaðir að læra og fá ekki inn í skólana. Við erum alltaf að tala um að efla iðn- og starfsnám. Þá þarf virkilega að taka á og byggja skóla og útvega Tækniskólanum góða lóð á höfuðborgarsvæðinu,“ segir Hilmar.

En upplifir þú það þannig að það væri hægt að fylla í þessi lausu störf í byggingariðnaðinum á næstu árum, að það verði ekki þannig að það verði skortur á fólki?  „Ja, það eru 700 manns sem vilja læra okkar greinar. Það myndi létta verulega undir og þá þyrfti að flytja inn minna vinnuafl. “

Heimild: Ruv.is

Previous articleGæti hækkað fasteignaverð enn frekar
Next articleFyrsta kerið í Öxarfirði í notkun fyrir árslok