Frá þessu er greint í Viðskiptablaðinu sem kom út í dag. Þar segir frá kaupum félagsins HM2 hótela á lóð og húsnæði við Hallarmúla 2. Félagið, í eigu Fannars Ólafssonar og Andra Gunnarssonar, fékk 700 milljóna króna lán hjá Landsbankanum og 300 milljóna króna seljandalán hjá HM2 sem seldi því eignina. Markmiðið var að reisa hótel á lóðinni, rétt fyrir aftan Hilton Nordica hótelið.
Þessi áform fóru fyrir brjóstið á stjórnendum Hilton Nordica hótelsins sem rifjuðu upp að sett hefði verið kvöð á lóðina árið 1975 um að þar ætti einungis að fara fram starfsemi sem sneri að sölu bíla og bílavarahluta, starfsemi sem bryti ekki í bága við rekstur hótelsins eða eiganda þess.
Þessari kvöð var aflétt 1993 en stjórnendur hótelsins vildu meina að það hefði verið gert fyrir mistök og dæmdi Hæstiréttur þeim í vil. Þar með varð ljóst að ekki yrði reist hótel við hlið þess hótels sem fyrir var og áform nýju eigendanna þar með farin út um þúfur.
Á endanum var lóðin við Hallarmúla 2 seld á 540 milljónir króna sumarið 2021, að því er fram kemur í Viðskiptablaðinu, 460 milljónum króna minna en hún var keypt á vorið 2018, að ótöldum vöxtum sem höfðu safnast upp. Félagið var svo tekið til gjaldþrotaskipta í desember og fékkst ekkert upp í 335 milljóna króna kröfur.
Heimild: Ruv.is
