Garðabær Skipulagsnefnd Garðabæjar tók fyrir beiðni Landslags um breytingu á deiliskipulagi Kauptúns í vikunni. Í breytingunni er gert ráð fyrir stækkun lóðar IKEA til vesturs ásamt stækkun byggingarreits.
Stefán Rúnar Dagsson, framkvæmdastjóri IKEA, segir að fyrirtækið sé með það til skoðunar að byggja eitt stórt vöruhús við verslunina í stað þess að hafa þrjú vöruhús í nágrenninu.
Kemur fram að rekstrarfélag Kauptúns og Urriðaholt ehf. hafi veitt breytingartillögunni jákvæða umsögn, hún hafi verið kynnt fyrir Vegagerðinni og ákveðið verið að auglýsa tillöguna.
Ef ráðist verður í framkvæmdir mun lóðin stækka til vesturs um 16.866 fermetra, í 73.269 fermetra eftir breytingu. Hámarksbyggingarmagn á lóð eykst úr 22.500 í 35.000 fermetra.
Stefán segir að um sé að ræða hugleiðingar um stækkun á vöruhúsi til hagræðingar. Um leið sé það alveg óráðið hvenær ráðist yrði í framkvæmdir ef hugmyndirnar yrðu samþykktar.
IKEA opnaði á Íslandi árið 1981, verslunin flutti í Kauptún árið 2006 en var þar áður til húsa í Holtagörðum í Reykjavík.
Heimild: Frettablaðið.is
