Úrskurðarnefnd umhverfis- og auðlindamála hafnaði í gær að ógilda bæri veitingu framkvæmdaleyfis fyrir Suðurnesjalínu 2 í Reykjanesbæ og Grindavíkurbæ.
Hún felldi hins vegar úr gildi ákvörðun Hafnarfjarðabæjar um að veita framkvæmdaleyfi og einnig ákvörðun bæjarstjórnar Sveitarfélagsins Voga um að hafna umsókn Landsnets um leyfi.
Síðastnefnda sveitarfélagið hefur staðið harðast á móti að Suðurnesjalína yrði lögð yfir land sveitarfélagsins.
Brýnt að tryggja rafmagnsöryggi sem fyrst
Guðmundur Ingi Ásmundsson forstjóri Landsnets segir að nú þurfi bæjarstjórnir í Hafnarfirði og Vogum að taka málið upp að nýju.
Í úrskurðunum séu ábendingar um næstu skref og hann vonist til að Landsnet geti nú haldið áfram viðræðum við sveitarfélögin:
„Úrskurðurinn í málinu er nýfallinn og við þurfum að skoða málið aðeins betur.
En við leggjum sem fyrirtæki mjög mikla áherslu á það að allir aðilar vinni hratt og vel því að málið er brýnt.
Það eru mjög miklir almannahagsmunir undir verkefninu. Það eru þúsundir heimila og hundruð fyrirtækja á svæðinu sem að byggja á öruggu og tryggu rafmagni.
Það hefur ekki verið undanfarið þannig og brýnt að úrbætur komi sem allra allra fyrst. Og nefndin bendir einfaldlega á mikilvægi þess að skoða samfélagsþáttinn sérstaklega.“
Heimild: Ruv.is
