Ríkisstjórnin hefur samþykkt að fara í miklar endurbætur og uppbyggingu í fangelsinu á Litla-Hrauni á Eyrarbakka að tillögu dómsmálaráðherra.
Að mati Framkvæmdasýslu ríkisins er kostnaður við nauðsynlegar endurbætur áætlaður um 1,6 milljarðar króna.
Peningarnir verða meðal annars notaðir til að byggja upp öfluga heilbrigðis- og endurhæfingarþjónustu fyrir fangelsiskerfið í heild og einnig til að lagfæra aðstöðu, bæði fanga og fangavarða, á Hrauninu.
Hinar ýmsu deildir fangelsisins verða aðskildar og aðbúnaður aðstandenda til heimsókna endurbættur.
Litla-Hraun er stærsta fangelsi landsins og því eðlilegt að horfa til þess við uppbyggingu á öflugri heilbrigðis- og endurhæfingarþjónustu fyrir fangelsiskerfið.
Lengi hefur legið fyrir að húsnæði og aðstaða er ófullnægjandi.
Með framkvæmdum þeim sem nú verður ráðist í er stefnt að því að vandamál fangelsisins verði færð í fullnægjandi horf. Framkvæmdunum á að vera fulllokið um mitt ár 2023.
Heimild: BBL.is
