Þrátt fyrir að tímabundið hafi dregið úr nýjum byggingarverkefnum á meðan óvissa ríkir um efnahagsleg áhrif COVID-19 var mikill fjöldi byggingarleyfa fyrir nýjar íbúðir veittur á síðasta ári.
Vísbendingar eru um að byggingageirinn hafi ekki orðið fyrir miklum skakkaföllum vegna COVID-19 farsóttarinnar. Skuldir byggingageirans við kerfislega mikilvæga banka dróst saman um 15 prósent að raunvirði í lok janúar á milli ára enda hefur fasteignasala verið mikil.
Þetta sagði Haukur C. Benediktsson, framkvæmdastjóri fjármálastöðugleika hjá Seðlabanka Íslands, á opnum fundi í morgun.
Fjöldi starfandi í byggingariðnaði haldist stöðugur
Hann benti á að fjöldi starfandi í byggingariðnaði hafi haldist nokkuð stöðugur undanfarin misseri og fram kemur í ritinu Fjármálastöðugleiki sem Seðlabankinn hefur veg og vanda að, að þar að auki hafi frystingar útlána til byggingargeirans verið óverulegar.
Ný lán til fyrirtækja í byggingageiranum jukust um 20 milljarða á árinu 2020. Hrein ný útlán reyndust samt sem áður neikvæð um 24 milljarðar króna vegna aukinna uppgreiðslna á tímabilinu, að því fram kemur í ritinu.
„Á fyrstu tveimur mánuðum yfirstandandi árs hafa hrein ný útlán til byggingageirans áfram mælst neikvæð. Á heildina litið hafa hrein ný útlán til fyrirtækja þó heldur farið vaxandi á síðustu mánuðum, mögulega til marks um minnkandi óvissu,“ segir í ritinu.
Í Fjármálastöðugleika segir að rúmlega 3.800 nýjar íbúðir hafi komið inn á íbúðamarkaðinn á síðasta ári sem sé metfjöldi.
Fjöldi byggingarleyfa veittur á síðasta ári
„Um fjórðungs samdráttur var þó á íbúðum í byggingu í lok ársins samanborið við lok árs 2019 og þá fækkaði einnig verulega íbúðum sem framkvæmdir hófust við á árinu. Íbúðatalning Samtaka iðnaðarins frá mars síðastliðnum sýnir sömuleiðis mikla fækkun á íbúðum í byggingu á höfuðborgarsvæðinu.
Þrátt fyrir að tímabundið hafi dregið úr nýjum verkefnum á meðan óvissa ríkir um efnahagsleg áhrif faraldursins var mikill fjöldi byggingarleyfa fyrir nýjar íbúðir veittur á síðasta ári samkvæmt ársskýrslu byggingarfulltrúans í Reykjavík.
Aðgerðir Seðlabanka Íslands og stjórnvalda hafa stutt við byggingarstarfsemi til dæmis með lækkun vaxta og endurgreiðslu virðisaukaskatts af vinnu við viðhald húsnæðis,“ segir í Fjármálastöðugleika.
Heimild: Frettabladid.is
