Landsnet vill vekja athygli á því að víða á hálendinu er nú hættulega stutt upp í háspennulínur vegna mikilla snjóalaga.
Sérstaklega er vakin athygli á stöðu mála að Fjallabaki þar sem mikil snjóalög eru í kringum Sigöldulínu 4. Ekki hefur verið gripið til sérstakra merkinga þar en útivistarfólk er beðið um að fara með gát, sérstaklega á þeim svæðum sem sýnd eru með rauðum hring á kortinu hér að neðan. Á kortinu hlykkjast Fjallabaksvegur eftir miðri mynd. Þetta eru þekkt snjóasvæði en veður og vindar í vetur, sem á stundum hafa verið frekar suðlægir, gætu líka hafa valdið snjósöfnun á óhefðbundnum stöðum.
Þá skal áréttað að háspennulínur eru ekki alltaf sýnilegar vegna snjóa og slæms skyggnis. Í miklu fannfergi minnkar bil frá jörðu að línu og ísing getur leitt til þess að línur sigi mikið. Við verstu aðstæður geta leiðarar verið á kafi í snjó og lífsnauðsynlegt að gæta ýtrustu varúðar. Allir sem ætla að fara á fjöll, bæði vélsleða-, skíða- og göngufólk, eru því hvattir til að fara með mikilli gát nærri háspennulínum og möstrum. Góð regla er að athuga hvort og þá hvar háspennulínur liggja um það svæði sem ferðast skal um, áður en lagt er af stað.
